د لوړو زده کړو وزارت رهبري شورا ناسته، د دغه وزارت سرپرست وزیر په مشرۍ تر سره شوه.
د ناستې په پیل کې د لوړو زده کړو سرپرست وزیر شیخ الحدیث مولوي نداء محمد ندیم صاحب د هېواد جنوب لوېديځ زون تحصیلي بنسټونو ته د خپل سفر په اړه معلومات ورکړل او ویې ویل: «په یاد سفر کې مو د تحصیلي بنسټونو ستونزې، اړتیاوې او نیمګړتیاوې په نښه او د حل په موخه مو یې اړوندو مسؤلینو او ادارو ته لارښوونې وکړې.»
ښاغلي یاد کاري سفر له لاسته راوړنو ډک وباله او ویې ویل چې د استادانو، محصلینو او مسؤلینو وړاندیزونه مو واورېدل، چې د تحصیلي ډګر په پیاوړتیا کې به کار ترې واخیستل شي.
دغه راز د لوړو زده کړو سرپرست وزیر په امارتي پوهنتونونو کې پر تدریس د بوختو استادانو د فوق لېسانس برنامو د فیسونو معاف کېدو ته په اشارې سره، د هېواد له تحصیلي نظام څخه د اسلامي امارت د مشرانو ملاتړ وستایه او ویې ویل چې له دې وروسته به یادو استادانو ته په لیلیو کې د ژوند اسانتیا رامنځ ته کړي.
همدارنګه د لوړو زده کړو وزارت په رهبري شورا کې د دغه وزارت د دعوت او ارشاد رئیس شیخ شاکرالله وحدت اصلاحي بیان وکړ او د حق الله او حق العباد اړوند موضوع یې خبرې وکړې.
دغه راز د تېرې شورا پرېکړو ته لنډه کتنه وشوه او د شویو کارونو راپور واورېدل شو.
وروسته له اجنډا سره سم پر ټاکل شویو موضوعاتو هر اړخیز بحثونه او لازمې پرېکړې وشوې.
د یادونې وړ ده چې رهبري شورا ته د هېواد خصوصي پوهنتونونو مسؤلین راوغوښتل شول، د هغوی د کانکور ازموینې، اقتصادي ستونزو پر حل او کیفیت لوړونې بحث ورسره وشو.
