د لوړو زده کړو وزارت سرپرست وزير د پوهنتون د امنيت د ارزونې په اړه د ګمارل شوې ډلې راپور واورېد
د لوړو زده کړو وزارت سرپرست وزير له ګمارل شوو کمېټو څخه د پوهنتونونو د امنيت د ارزونې او د کابل پوهنتونو د تېرې اونۍ د پېښې د جنازو، فاتحو او د ټپيانو د عیادت په مراسمو کې د ګډون راپور واورېد.
د لوړو زده کړو سرپرست وزير دوکتور عباس بصير د دې وزارت د رهبري شورا په غونډه کې د کابل پوهنتون د خونړۍ پېښې د شهيدانو پاک روح ته د دعا تر څنګ، د يادو ګمارل شوو کمېټو راپور واورېد او ويې ويل چې د هېواد د پوهنې او دين دښمنان، په هر هغه ټکي چې د ډېرو خلکو د اندېښنې سبب کېږي بريد کوي او وحشت خپروي.
د لوړو زده کړو وزارت سرپرست وويل چې د تحصيلي بنسټونو د امنيت د تامین له پاره د کابينې په غونډه کې هم بحثونه شوي دي او همداراز د لوړو زده کړو وزارت هم په دې اړه په يوه هر اړخيزه طرحه کار کوي چې زيانمن ټکي په نښه او په دې برخه کې اړین اقدامات وکړي.
د کابل پوهنتون د علمي مرستيال او د لوړو زده کړو د بشري سرچينو د رييس په غونډه کې د کابل پوهنتون د پېښې د جزياتو او په دې اړه د ترسره شوو اقداماتو په برخه کې راپورونه وړاندې شول.
د کابل پوهنتون علمي مرستيال وویل چې د دې علمي بنسټ له مسولينو او استادانو څخه ګمارل شوې کمېټې د جنازې او فاتحې په مراسمو او همداراز د ټپيانو په عيادت کې برخه واخيسته. نوموړي يادونه وکړه چې د هېواد د ولسمشرۍ ماڼۍ نقدي مرسته هم د شهيدانو او ټپيانو کورنيو ته ورکړل شوه چې هر ټپي ته ۵۰ زره او د هر شهيد شوي کورنۍ ته ۱۰۰ زره افغانۍ ورکړل شوې. همداراز د دې وزارت د بشري سرچينو رييس د وزارت د يو شمېر معينانو او رييسانو د ګمارل شوې ډلې چې د جنازې، فاتحې او ټپيانو د عيادت په مراسمو کې يې برخه اخيستې وه غونډې ته يې راپور وړاندې کړ. ټاکل شوې ده چې ډېر ژر به د کابل پوهنتون د شهيد شوو محصلينو پاکو ارواوو ته د عمومي فاتحې اخيستنې مراسم د لوړو زده کړو وزارت او کابل پوهنتون له لوري ترسره شي.
