د لوړو زده کړو وزارت علمي معین پوهنمل عبدالتواب بالاکرزي د 2021 Going Global په کنفرانس کې په انلاین بڼه ګډون وکړ او وینا یې وکړه
د (Going Global) کنفرانس هر کال یو ځل د British Council)) له لوري یو ځل جوړېږي، چې د نړۍ زیاترو هېوادونو پالیسي جوړونکي او د لوړو زده کړو مسوولان او څانګپوهان (متخصصین) پکې ګډون کوي.
ناسته د پخوا پر خلاف چې په حضوري بڼه به په یوه هېواد کې جوړېده، په انلاین توګه جوړه شوې وه.
په یاده ناسته کې د لوړو زده کړو وزارت علمي معین په افغانستان کې د لوړو زده کړو وضعیت، په ځانګړې توګه د کورونا بحران، د قرنطین شرایطو او د افغانستان تحصیلي نظام پر کیفیت یې د اغېزو، ستونزو او له هغو څخه د وتو په اړه وینا وکړه.
پوهنمل بالاکرزي وویل چې افغانستان د سویلي اسیا غړو هېوادونو په ډله کې یو له هغو هېوادونو دی چې له بده مرغه له تېرو څلور لسیزو راپدېخوا د نیابتي جګړو ډګر او د نړیوالې ترهګرۍ قرباني و او دغه وضعیت د لوړو زده کړو په برخه کې موخو ته د رسېدو لپاره د ډېریو پرمختګونو مخه ډب کړې وه، خو بیا هم په وروستیو دوه لسیزو کې د دولت او نړیوالې ټولنې په ملاتړ سره د پام وړ پرمختګونه او لاسته راوړنې شوي دي.
هغه په ټول هېواد کې د زدکړیالانو، استادانو، پوهنتونونو، دولتي او خصوصي لوړو زده کړو بنسټونو د پرمختیا د کچې او همدارنګه زده کړو ته د ښځو د لاسرسي په اړه له شلو کلونو راپدېخوا پرتلیز معلومات وړاندې کړل.
پوهنمل عبدالتواب بالاکرزي هغه ستونزې چې د کورونا ویروس له امله راپورته شوې، په افغانستان کې د لوړو زده کړو د پرمختګ لپاره یو خنډ وباله، خو ویې ویل چې لوړو زده کړو وزارت په هېواد کې د تحصیل د راټيټېدو د مخنیوي په پار د الکترونیکي زده کړو پروګرامونه جوړ کړي دي. هغه زیاته کړه، که څه هم دغه پروسه د انټرنېټ، برېښنا او معلوماتي ټکنالوژۍ له ستونزو سره مخ شوې ده، خو په ټوله کې د زده کړو پروسه درېدلې نه ده، هڅه کوو چې د دغې برخې ستونزې له منځه یوسو.
پوهنمل بالاکرزي د افغانستان لوړو زده کړو په برخه کې د نړیوالې ټولنې له همکارۍ مننه وکړه او اوسنی وخت یې د همکاریو زیاتولو او په علمي حوزه کې د ګډو کارونو او پرمختګ لپاره غوره وباله او ویې ویل:"ګډې همکارۍ موږ دغې موخې ته نږدې کوي، چې په زده کړو سمبال بشري ځواک نه یوازې په ملي مارکېټ ته، بلکې سیمییز او نړیوال مارکېټ ته د کار له چاپېریال سره سمو مهارتونو په درلودو سره وړاندې کړو."
په پای کې د ناستې ګډونوالو له لوري پوښتنې هم وشوې چې د لوړو زده کړو وزارت علمي معین له خوا ځواب شوې.
د لا زیاتو معلوماتو لپاره لینک کیکاږئ:
