د لوړو زده کړو وزارت مالي او اداري معين د البېروني پوهنتون وضعيت بر رسي کړ
د ولسمشر د لومړي مرستیال د لارښوونې پر بنسټ د لوړو زده کړو وزارت مالي او اداري معین نور احمد دروېش د یوه پلاوي پر مشرۍ کاپیسا ولایت ته د البیروني پوهنتون د وضعیت ارزونې په موخه سفر وکړ.
نور احمد دروېش په داسې حال کې چې د لوړو زده کړو وزارت یو شمیر ريیسانو او د ولسمشر د لومړي مرستيال د دفتر استازي ورسره ملتیا کوله؛ د البیروني پوهنتون د رهبرۍ او استادانو ستونزې او غوښتنې واورېدې.
د لوړو زده کړو وزارت مالي او اداري معین وویل: ((لوړو زده کړو وزارت د بوديجوي امکاناتو په پام کې نیولو او په هېواد کې د متوازنې پراختیا په موخه، مکلف دی چې تحصیلي بنسټونو ته په مساوي توګه پاملرنه وکړي.))
هغه زیاته کړه، له نېکه مرغه البیروني پوهنتون د ودانیو او استادانو د لوړې وړتیا لرلو له پلوه نسبت نورو تحصیلي بنسټونو ته په ښه حالت کې دی، نوموړي د البیروني پوهنتون د پرمختیايي لرلید د لوري ټاکو په موخه د ستراتیژیک پلان پر لرلو ټینګار وکړ او د وروستیو پرمختګونو او د پوهنتونونو د مالي خپلواکۍ د مقررې د فعالیتونو په اړه يې معلومات ورکړل.
ښاغلي دروېش همداراز څرګنده کړه چې په راتلونکي ۱۴۰۰ مالي کال کې د البیروني پوهنتون په ګډون تحصیلي بنسټونو ته یو شمېر زېربنايي پروژې په پام کې نیول شوې دي چې له مخې به يې د ودانیو ستونزې تر يوې کچې اوارې کړي.
دروېش د یاد پوهنتون له ټولو علمي او اداري غړو وغوښتل چې له رهبرۍ سره د پوهنتون په پرمختګ کې هر راز مرستې وکړي او د لوړو زده کړو وزارت به هم تر خپله وسه خپلې مرستې ونه سپموي.
وروسته پوهنمل عبدالقهار سروري او د رهبرۍ څو تنو غړو او استادانو، البیروني پوهنتون ته د ورغلي پلاوي له ورتګ مننه وکړه؛ یو شمېر ستونزې او غوښتنې يې چې د نجونو د لیلیې، د انګړ دېوال، د سړکونو سفالټ، د ظرفیت لوړول، ټرانسپورټ، د اوبو رسولو سېسټم، د فایبري نوري شبکې تړل او نورو مسایلو اړوند موضوعات له پلاوي سره شریک کړل. وروسته مالي او اداري معین او ورسره تللي پلاوي د پوهنتون له بېلابېلو برخو لیدنه وکړه.
د یادونې وړ ده، البیرونی پوهنتون په ۱۳۷۷لمریز کال جوړ شوی چې دا مهال ۹پوهنځي، ۲۸څانګې، ۲۰۰تنه استادان ا و ۷۲۸۰ تنه نارینه او ښځینه محصلین لري.
