د لوړو زده کړو وزارت مالي او اداري معین د AHEAD پروژې له مسوولینو سره ولیدل
د لوړو زده کړو وزارت مالي او اداري معین نور احمد دروېش او د مسلکي تعلیماتو انسټیټیوت معین حمید اکبر نن د AHEAD پروژې له مسوولینو سره ولیدل. په دغه لیدنه کې د کرنې، طب، انجنیري او روغتیا په برخو کې د(دوه کلنې ډيپلومې) پروګرام پر پیلولو بحث وشو.
د لوړه زده کړو مالي او اداري معین وویل چې د پوهنتونونو د اړتیاوو پر بڼست د لابراتوارونو لپاره باید تخنیکي کسان وروزل شي او په دغه برخه کې د مسلکي تعلیماتو انسټیټیوت کولای شي پوره همکاري وکړي.
همدارنګه په دې ناسته کې پرېکړه وشوه چې د AHEAD پروژه دې څېړنه وکړي ترڅو د ټولنې د اړتیاوو پر بنسټ څانګې په ګوته شي او د ګډ ډیپلوم پروګرام دې ډیزاین شي.
دواړه خواوو تصمیم ونیوه چې په راتلونکې غونډه کې به د یوې ګډې طرحې د چمتو کولو پر څرنګوالي بحث وکړي ترڅو له AHEAD سره شریکه شي او هغوی یې د پلي کولو پر څرنګوالي غور وکړي.
