د لوړو زده کړو وزارت مالي او اداري معین په کندهار ولایت کې د عالمیې او عالیې مرحلو ازموینو له بهیر څخه لیدنه او څارنه وکړه
د لوړو زده کړو وزارت مالي او اداري معین حافظ مولوي محمد حامد حسیب په کندهار پوهنتون کې د عالمیې او عالیې مرحلو شاوخوا ۲ زره ګډونوالو او همدارنګه په کندهار جهادي مدرسه کې د یادو ازموینو پروسه له نږدې وڅارله.
د لوړو زده کړو وزارت مالي او اداري معین د ازموینو د څارنې پرمهال وویل چې د ازموینو پروسې په اړه مو د کندهار پوهنتون او کندهار جهادي مدرسې له مسؤلینو او د ازموینو له نګرانانو سره وکتل او د ازموینو ښه ترسراوي په موخه مو خبرې ورسره وکړې.
نوموړي د یادو ازموینو په اړه وویل: «الحمدالله د ازموینو پروسه په ډېر شفاف ډول او د امن په فضاء کې جریان لري.»
د یادونې وړ ده په دغو ازموینو کې د کندهار ابراهیم النخعي رحمه الله جامعې د العالمیة العلیا ازموینې هم شاملې دي.
نېټه: چهارشنبه
۱۴۴۶ هـ.ق د رجب المرجب ۱۴مه
۱۴۰۳ هـ.ش د جدي ۲۶مه
۲۰۲۵ م د جنوري ۱۵مه
