د لوړو زده کړو وزیر د ترکیې هېواد د یالووا ولایت له والي سره وکتل
د لوړو زده کړو وزیر دوکتور عباس بصیر «په پانګونه او بنسټيزه پراختیا کې د پوهنتونونو رول» کنفرانس په پای کې چې په یالووا ولایت کې جوړ شوی و، د دغه ولایت له والي سره وکتل او دواړو اړخونو د اکاډمیکو همکاریو او علمي اړیکو د پراختیا په اړه خبرې وکړې او له یوبل سره يې نظرونه شریک کړل.
د لوړو زده کړو وزیر د یالووا والي څخه له دې امله مننه وکړه، چې په کنفرانس کې له ګډونوال افغاني پلاوي ښه مېلمهپالنه وکړه او د دغه کنفرانس د بریا مبارکي یې ده او د ترکیې دولت ته وویله. هغه هیله څرګنده کړه چې د کنفرانس بل پړاو په افغانستان کې تر سره شي او د لا ډېرو اکاډمیکو اړیکو او همکاريو د جلب لامل شي.
همدارنګه د لوړو زده کړو وزیر د یالووا ښار پرمخګتونه په ځانګړي ډول چاپېریال، زرغونتیا او د سیلانیانو جلبول وستایل.
د یالووا والي هم په یاد کنفرانس کې د لوړو زده کړو وزیر له ګډون څخه خوښي وښوده او د دواړو اړخونو د تحصیلي بنسټونو تر منځ یې د علمي همکاریو او تجروبو شریکولو ژمنه وکړه.
په دې لیدنه کې دواړو اړخونو، د دواړو هېوادونو د خلکو تر منځ د ښو او تاریخي اړیکو او دوستۍ یادونه وکړه او د اړیکو پر دوام او ګډو همکاریو یې ټینګار وکړ.
