د لوړو زده کړو په وزارت کې د ستراتیژیک پلان، کاري پلان، احصائیې ترتیب او راپور ورکولو په اړه روزنیز ورکشاپ جوړ شو
شنبه، ۲۸ کب ۱۴۰۰
د لوړو زده کړو په وزارت کې د ستراتیژیک پلان، کاري پلان، احصائیې ترتیب او راپور ورکولو په اړه روزنیز ورکشاپ جوړ شو.
په دغه روزنیز ورکشاپ کې د لوړو زده کړو وزارت د پلان، پالیسۍ او تقنین رئیس مفتي رضوان الله منیب او د کابل او ولایتونو د دولتي او خصوصي تحصیلي بنسټونو استازو ګډون کړی وو.
د ورکشاپ په پیل کې د لوړو زده کړو وزارت سرپرست مولوي عبدالباقي حقاني په اسلام کې د پلان پر اهمیت خبرې وکړې او ویې ویل، د دې لپاره چې هېواد په بېلابېلو برخو کې پرمختګ وکړي او له اوسني وضعیت څخه راووځي، موږ باید یو اقتصادي، اداري او تحصیلي پلان په لاس کې ولرو، څو د هېواد له ننګونو سره مقابله وکړو.
مولوي حقاني د ورکشاپ له ګډونوالو مننه وکړه او زیاته یې کړه، چې د هېواد ښوونیز نظام ته ډېره پاملرنه اړینه ده او په کار ده، چې د متخصصو کسانو د روزلو لپاره د نظري درسونو ترڅنګ عملي پروګرامونه په لاره واچول شي.
د لوړو زده کړو وزارت سرپرست وزیر په باور، د هېوادونو پرمختګ د ښوونیز نظام په پیاوړتیا پورې اړه لري او په دې برخه کې باید موږ ټول خپله ونډه په ښه توګه ترسره کړو.
په دغه روزنیز ورکشاپ کې د ستراتیژیک پلان، کاري پلان، احصائیې او راپور ورکولو د چمتووالي او ترتیب په اړه ګډونوالو ته معلومات ورکړل شول او د هغوی پوښتنو ته ځوابونه وویل شول.
