د هېواد د تحصیلي بنسټونو د ښوونې او روزنې د کمپیوټر ساینس د فوق لیسانس او د ژبو او ادبیاتو او کمپوټر ساینس د لیسانس څانګو د تحصیلي نصاب د بیا کتنې او پراختیا درېیم پړاو کلسټر پای ته ورسېد.
د ياد کلسټر د پای په ورځ د استادانو په استازولۍ پوهنوال سيد حسن شاه رحيمي خبرې وکړې او ويې ويل، چې غوره ټولنه هغه ټولنه ده، چې د علومو او زده کړو ارزښت ته په کې پاملرنه کېږي. هغه همداراز د هېواد د تحصیلي بنسټونو د نصاب د بیا کتنې او پراختیا په موخه د کلسټرونو د جوړولو په برخه کې د لوړو زده کړو وزارت د مشرتابه له پاملرنې او همکارۍ مننه وکړه.
ورپسې د هېواد د تحصیلي نصاب ملي کمېسیون غړي پوهنوال داوود شاه فاروق د نصاب د پراختیا او بیا کتنې په برخه کې د استادانو هڅې او تکالیف وستایل او زیاته یې کړه، چې د هېواد ښوونیز نصاب د اسلامي ارزښتونو او ملي روحیې په پام کې نیولو سره جوړ او تعدیل شوی، چې د راتلونکي نسل او د هېواد د تحصیلي نظام لپاره به ګټور تمام شي.
