د وردګ لوړو زده کړو موسسه کې د ۱۹.۲ میلیونه افغانیو په ارزښت پنځه بېلابېلې پروژې ګټې اخیستنې ته وسپارل شوې.
د یادو پروژو د ګټې اخیستنې په مراسمو کې د لوړو زده کړو وزارت مالي او اداري رئیس عبدالباري خپلواک، د بشري سرچینو رئیس مفتي عبدالکریم امیري، د یاد ولایت مرستیال والي شیخ شیراحمد حقاني، د وردګ لوړو زده کړو مؤسسې نوي او پخواني رئیسانو شیخ صفت الله حقاني او پوهنیار حمیدالله عمري، استادانو، قومي مشرانو او یو شمیر محصلانو ګډون کړی و.
د لوړو زده کړو وزارت پلاوي، یادو چارواکو، استادانو او قومي مشرانو د وردګ لوړو زده کړو په مؤسسه کې د دغو پروژو پر تکمیلېدو خوښي وښوده او د لوړو زده کړو وزارت له رهبري پلاوي څخه یې مننه وکړه.
د وردګ لوړو زده کړو مؤسسې مسئولینو په وینا هغه پروژې چې په یاد تحصیلي بنسټ کې ګټې اخیستنې ته وړاندې شوې د بیارغونې، سولري برېښنا، کمپیوترلب او سولري برېښنا، د کتابتون پارټیشن، د مؤسسې زرغونتیا لپاره سولري برېښنا، د اوبو رسولو سیستم، د انترنېټ او د تجهزاتو برابرولو پروژې شاملې دي، چې ګټې اخیستنې ته وسپارل شوې.
د یادونې وړ ده چې وردګ لوړو زده کړو مؤسسې د کرنې او ښوونې او روزنې پوهنځي درلودې، چې څو دورې فارغان یې هم ټولنې ته د خدمت په موخه وړاندې کړي، خو د شرعیاتو او کمپیوټر ساینس پوهنځي پکې نوې ایجاد شوې دي.
نیټه: سه شنبه
۱۴۴۴/۹/۶/ هـ ق ۱۴۰۲/۱/۸ هـ ش ۲۰۲۳/۳/۲۸ م
