د کابل پوهنتون له ۷۰ څانګو څخه ۲۵۰۰ تنه محصلین فارغ او ټولنې ته د خدمت لپاره وړاندې شول. 

د لویې جرګې په خیمه کې په همدې مناسبت فراغتغونډه کې د اسلامي امارت د کابینې غړو، د لوړو زده کړو وزارت مشرتابه پلاوي، د کابل پوهنتون رهبرۍ، استادانو، فارغو شویو محصلینو او د هغوی د کورنیو غړو ګډون کړی و.
په یاده غونډه کې د لوړو زده کړو سرپرست وزیر شیخ الحدیث مولوي ندا‌ء محمد ندیم صاحب د فارغینو پر فراغت د خوښۍ تر څنګ، له لوړو زده کړو څخه د ا.ا.ا د مشرانو پر ملاتړ او فعالیتونو خبرې وکړې.
هغه وویل: «د ا.ا.ا مشرانو په اخلاص سره د لوړو زده کړو وزارت له پروګرامونو ملاتړ کړی او دغه وزارت توانېدلی چې د تحصیلي نصاب بیا کتنې، د ازادې سیالۍ له لارې د ۲۵۰۰ تنو استخدام، د زیربنایي پروژو او د نویو څانګو جوړولو په برخه کې لاسته راوړنې ولري.» 
د لوړو زده کړو سرپرست وزیر همدارنګه محصلینو ته په خطاب کې وویل، چې د لوړو زده کړو وزارت هڅه کوي، چې په هېواد کې د ماسټرۍ او دوکتورا نور پروګرامونه رامنځته او ځوانانو ته د لوړو زده کړو زمینه برابره کړي.
همدارنګه د کورنیو چارو وزارت سرپرست خلیفه سراج الدین حقاني خبرې وکړې او ویې ویل، چې له څو کلونو راهیسې د دیني مدرسو او پوهنتونونو او همدارنګه د افغانستان د خلکو تر منځ د دسیسو او توطیو له امله د افغانستان د خلکو تر منځ واټن رامنځ ته شوی و، چې د اسلامي امارت په بیا واکمنېدو سره د دې واټن د له منځه وړلو هڅه شوې.
هغه زیاته کړه: «د خدای په فضل سره افغانستان خپله ازادي وګټله او زموږ محصلین باید له دې فرصت څخه ښه ګټه پورته کړي.»
همدا راز په دې غونډه کې د ملي دفاع وزارت سرپرست مولوي محمد یعقوب مجاهد د ساینس پر ارزښت خبرې وکړې او ویې ویل چې د ساینس زده کړه او د خلکو په خدمت کې یې کارول عبادت دی. 
نوموړي دغه راز په ټولنه کې د يووالي او زغم پر رامنځته کولو خبرې وکړې او ويې ويل، چې د ټولنې ټول غړي د انسان د بدن د غړو په څېر دي، چې هر غړی يې خپل مسووليت پر غاړه لري، نو ټول دیني او عصري علوم په یو بل پورې تړلي دي او د انسانانو د هوساينې لپاره ترې کار اخيستل کېږي.
وروسته د لوړو زده کړو وزارت علمي معین دوکتور لطف الله خیرخواه د عالم او لوستي شخص کېدو تر منځ پر توپیر، د کابل پوهنتون رئیس دوکتوراسامه عزیز د کابل پوهنتون د ۹۰ کلن تاریخ او لوړو ژورو، د کابل پوهنتون استاد ډاکټر نصر من الله مجاهد د لوړو زده کړو په برخه کې د ترسره شویو فعالیتونو او همدارنګه فارغ شوي محصل رضا محمد د فارغو محصلینو په استازیتوب خبرې وکړې.
د يادونې وړ ده چې د غونډې په پاى کې په ١٤٠٢ لمريز کال کې د معلوماتي ټکنالوژۍ له پوهنځي فارغ، حضرت شير چې د کابل پوهنتون د فارغانو په منځ کې یې لومړى مقام خپل کړ و، د لوړو زده کړو سرپرست وزیر له خوا ډالۍ ورکړل شوه.