لوړو زده کړو وزارت خپل کارمندان د ظرفیت لوړوالي په موخه لیسانس او ماسټري پروګرامونو ته معرفي کوي
دغه مطلب د لوړو زده کړو وزارت مالي او اداري معین نوراحمد درویش، په هغه ناسته کې چې د اداري او زیربنا ریاست له کارمندانو سره یې درلود، بیان کړ.
مالي او اداري معین د یاد ریاست د کارمندانو د غوښتنو او وړاندېزونو تر اوریدو وروسته وویل: یوه سالمه او پیاوړې اداره د هغې د کارمندانو په دوامداره ظرفیت لوړونه او زده کړو حاصلولو سره مله ده، له همدې کبله لوړو زده کړو وزارت پلان لري چې په ۱۴۰۰ کال کې، خپل اداري او مسلکي کارمندان دولتي او خصوصي لوړو زده کړو بنسټونو ته د لیسانس او ماسټري زده کړو په موخه معرفي کړي.
نوراحمد درویش له هغوی څخه وغوښتل چې د اجناسو په ساتنه، د ښو خدمتونو په وړاندې کولو، د با کیفیته اجناسو تسلیمولو، د کاري تعهد او صداقت لرلو، د ریاستونو تر منځ د مراسلاتو په را لنډولو، د اجناسو او تجهیزاتو د ثبت ډيټابیس رامنځته کولو او د برېښنا او انټرنیټ ستونزو حل کولو په برخو کې دې د خپلو کارمندانو لپاره لنډمهاله او اوږد مهاله روزنیز پروګرامونه په نظر کې ونیسي او د خدمتونو په وړاندې کولو کې دې جدي توجه وکړي تر څو مناسبه آسانتیاوې رامنځته شي.
په پای کې د اداري او زیربناو ریاست سرپرست سیدنسیم سادات ژمنه وکړه چې د لوړو زده کړو وزارت د مشرتابه د لارښونو مطابق به، د کاري پروګرامونو په تطبیق او د اداري، ساختماني او خدماتي چارو په آسانتیا کې د پخوا په پرتله لا زیات کوښښ وکړي.
