ننګرهار پوهنتون کې د محصلینو د ۹۷ څېړنیزو پروژو پوسټر نندارتون ترسره شو.
په یاد نندارتون کې د ننګرهار پوهنتون د وترنري علومو پوهنځي د وروستي کال محصلینو ۹۷ څېړنیزې پروژې نندارې ته وړاندې شوې.
په دغه نندارتون کې د لوړو زده کړو وزارت د تحقیق، تالیف او ژباړې رئیس دوکتور حمیدالله مزمل د هېواد د پوهنتونونو په کچه د څېړنو پر اوسني وضعیت خبرې وکړې او د هغې د ښه والي او بهبود لپاره یې د خپلو پلانونو او پروګرامونو په اړه د معلوماتو شریکولو ترڅنګ، استادانو او محصلینو ته د اصولو سره سم د څېړنو کولو سپارښتنې وکړې.
همداراز د ننګرهار پوهنتون د علمي چارو مرستیال پوهندوی احسان الله ناصح د علمي څېړنو د ترسراوي په ارزښت خبرې وکړې او ویې ویل، چې علوم له تحقیقه سرچینه اخلي او دا د پوهنتونونو دنده ده، چې د بېلابېلو موضوعاتو په اړه څېړنې ترسره، او پایلې یې له اړوندو ادارو او بنسټونو سره شریکې کړي.
دا په داسې حال کې ده، چې د لوړو زده کړو وزارت د ا.ا.ا له واکمنۍ وروسته څېړنو ته ځانګړې پاملرنه کړې او د هېواد په مختلفو تحصیلي بنسټونو کې یې د ملي او نړیوالو موضوعاتو په اړه بېلابېلو څېړنیزو کنفرانسونو دایرولو ترڅنګ، په ټولو تحصیلي بنسټونو کې د څېړنو معاونیتونه ایجاد کړي دي.
