د لوړو زده کړو وزارت مالي او اداري معین په خپل کاري دفتر کې د روغتیا نړیوال سازمان د بېړنۍ څانګې له مشر ډاکټر محمد تاهون سره وکتل. 

د لوړو زده کړو وزارت مالي او اداري معین مولوي حافظ محمد حامد حسیب، په داسې حال کې چې د کابل طبي علومو پوهنتون او علي اباد تدریسي روغتون رئيسانو هم حضور درلود، په افغانستان کې د روغتیا نړیوال سازمان د بېړنۍ څانګې مشر سره، د لوړو زده کړو وزارت تدریسي روغتونونو د تجهیز اړوند خبرې وکړې. 
د لوړو زده کړو وزارت مالي او اداري معین د علي اباد تدریسي روغتون د بېړنۍ څانګې د تجهیز له امله له روغتیا نړیوال سازمان څخه مننه وکړه او همدارنګه د یاد سازمان له استازي څخه یې وغوښتل چې د لوړو زده کړو وزارت تدریسي روغتونونو سره د وسایلو، زېربنا او مسلکي کادرونو په ظرفیت لوړونه کې همکاري وکړي. 
دغه راز د کابل طبي علومو پوهنتون رئیس دوکتور مفتي اسدالله نجات او د علي اباد تدریسي روغتون رئیس ډاکټر عبدالمطلب شینواري د روغتیا نړیوال سازمان له استازي سره په تدریسي روغتونونو کې خپلې اړتیاوې شریکې کړې. 
همدارنګه د روغتیا نړیوال سازمان د بېړنۍ څانګې مشر له تدریسي روغتونونو سره د مرستې او لا ډېرو تمويلوونکو د همکارۍ راجلبولو ژمنه وکړه. 
د یادونې وړ ده چې لوړو زده کړو وزارت د خپلو طبي څانګو محصلینو د عملي زده کړو او هېوادوالو ته د روغتیایي خدمتونونو وړاندې کولو لپاره ۱۳ تدریسي روغتونونه لري.
نېټه: یکشنبه
۲۱/۹/۱۴۴۵ هـ ق ۱۲/۱/۱۴۰۳ هـ ش ۳۱/۳/۲۰۲۴ م