د لوړو زده کړو سرپرست وزیر د کنړ له والي سره ولیدل
د لوړو زده کړو سرپرست وزیر او علمي معین پوهنمل عبدالتواب بالاکرزي د کنړ له والي سره ولیدل
په دې لیدنه کې د کنړ والي محمد اقبال سعید د دغه ولایت تحصیلي وضعیت په اړه د معلوماتو وړاندې کولو په ترڅ کې، د کنړ سید جمال الدین پوهنتون لپاره د نویو پوهنځیو جوړولو، تشکیل زیاتولو، تدریسي او اداري تعمیرونو، لابراتوارونو او د علمي څیړنیز مرکز جوړولو او همدارنګه د پوهنتون د پراختیا لپاره د ځمکې د ځانګړي کولو موضوع په اړه خپلې غوښتنې او وړاندېزونو مطرح کړل او په مختلفو برخو کې یې د لوړو زده کړو وزارت پر وروستیو فعالیتونو او پروګرامونو خوښي څرګنده کړه.
د لوړو زده کړو سرپرست وزیر او علمي معین پوهنمل عبدالتواب بالاکرزي د کنړ ولایت د تحصیلي وضعیت د راپور او د یاد پوهنتون د غوښتنو، اړتیاوو او ستونزو د اوریدلو څخه وروسته؛ د لوړو زده کړو وزارت د پراختیایي پروګرامونو او پلانونو په اړوند هر اړخیز معلومات وړاندې کړل.
پوهنمل بالاکرزي زیاته کړه چې لوړو زده کړو وزارت د هیواد د تحصیلي بنسټونو د اړتیاوو پوره کولو او هغو ته د لاسرسي په لارو چارو کې، د متوازنې پراختیایي پالیسۍ، بودیجوي آسانتیاوو او اولویت بندۍ ته په کتو؛ خپل پروګرامونه یو په بل پسي پلې کوي.
نوموړي د کنړ سید جمال الدین افغان پوهنتون اړتیاوو په اړه د یاد ولایت له والي څخه وغوښتل چې د خپلو اړتیاوو لیست د یاد پوهنتون له مسوولینو سره په همکارۍ په واضح او دقیقه توګه چمتو کړي او د لوړو زده کړو وزارت په واک کې یې ورکړي تر څو هغه ته رسیدګي وشي.
د یادونې وړ ده چې د کنړ سید جمال الدین افغان پوهنتون اوس مهال ۵ پوهنځي، ۲۰ ډیپارټمنټونه، ۹۳ تنه استادان او ۳۰۲۴ تنه محصلین لري.
