پوهنیار حامد عبیدی د لوړو زده کړو وزارت د ویاند په توګه معرفی شو
د لوړو زده کړو وزارت په وړاندېز او د جمهوري ریاست د عالي مقام د منظورۍ پر اساس، پوهنیار حامد عبیدي د لوړو زده کړو وزارت د ویاند په توګه وټاکل شو.
په هغه مراسمو کې چې په همدې مناسبت تر سره شول، د لوړو زده کړو وزارت مالي او اداري معین نوراحمد درویش د دقیقې او پر وخت اطلاع رسونې د اهمیت په اړه خبرې وکړې او ویې ويل چې لوړو زده کړو وزارت د پر وخت اطلاع رسونې اهمیت ته په کتو، په دې پرېکړه وکړه چې په یاده برخه کې یو نوی بست ایجاد کړي تر څو ددغې برخې کارونه په منسجمه او توحیدي بڼه تنظیم شي.
نوموړي زیاته کړه چې پخوا په دې برخه کې د یو ځانګړي بست د کمبود له کبله، د نشراتو او یا نورو څانګو رئیسانو به د خپل وظیفوي مسوولیت تر څنګ د ویاندۍ دنده هم مخته وړله، چې دا موضوع به د اړوندو ریاستونو په کاري بهیر کې د یو لړ ستونزو لامل ګرځيده.
د لوړو زده کړو وزارت مالي او اداري معین، پوهنیار حامد عبیدي ته په نوي بست کې د تقرر له امله مبارکي وویله او د نشراتو، اطلاعاتو او عامه اړیکو رئیس او د لوړو زده کړو وزارت له مخکیني ویاند عزیزاحمد اوریاخیل څخه چې اوه میاشتې یې په افتخاري ډول دغه دروند مسوولیت په ښه توګه مخته یووړ، مننه وکړه.
همدارنګه په دغو مراسمو کې پوهنیار حامد عبیدي په ده باندې د جمهوري ریاست د مقام او لوړو زده کړو وزارت مشرتابه له باور کولو څخه مننه وکړه او ژمنه یې وکړه چې د لوړو زده کړو وزارت او د هیواد د تحصیلي بنسټونو د اطلاع رسونې، فعالیتونو او لاسته راوړنو ته په انعکاس ورکولو کې به د اطلاع رسونې له نویو معیارونو څخه په ګټې اخېستنې سره خپل پروګرامونه تنظیم کړي.
پوهنیار حامد عبیدي د کابل پوهنتون ژورنالیزم پوهنځي د هغو علمي کادري غړو له ډلې څخه دی چې چې د نویو رسنیو په برخه کې یې خپله ماسټري له چین هیواد څخه تر لاسه کړې ده .
ددغو مراسمو په پای کې د لوړو زده کړو وزارت مالي او اداري معین د نشراتو، اطلاعاتو او عامه اړیکو رئیس او ددغه وزارت مخکیني ویاند عزیزاحمد اوریاخیل ته، چې د کرنتین په سختو شیبو او له هغه څخه وروسته دوران کې د نشراتو ریاست د کارونو مخته وړلو تر څنګ؛ وتوانید چې د لوړو زده کړو وزارت د فعالیتونو او پروګرامونو اړوند معلوماتو وړاندې کولو او اطلاع رسونې په برخه کې په بریالۍ توګه خپل مسوولیتونه سر ته ورسوي، ستاینلیک ډالۍ کړ.
