د لوړو زده کړو نوماند سرپرست وزير د خصوصي پوهنتونونو د ټولنې له مسولينو سره وليدل
د هېواد د تقنيني اسنادو پر بنسټ، د هېواد خصوصي، دولتي او تحصيلي بنسټونه د لوړو زده کړو وزارت په وړاندې د يو ډول باور لرونکي دي.
دغه خبرې د لوړو زده کړو وزارت نوماند سرپرست وزير دوکتور عباس بصیر د پوهنتونونو او لوړو زده کړو موسسو له مديره ډلې سره د کتنې پر مهال وکړې.
نوموړي په هېواد کې د خصوصي لوړو زده کړو د بنسټونو د وجودي فلسفې ارزښت ته په اشارې سره وويل چې د لوړو زده کړو خصوصي بنسټونه د لوړ جذب د وړتيا په لرلو سره کولای شي، د هېواد ډېرو ځوانانو ته په بېلابېلو څانګو کې د لوړو زده کړو اسانتيا برابره کړي او په دولتي بنسټونو کې د جذب د کمښت تشه ډکه کړي.
دوکتور عباس بصير څرګنده کړه چې د لوړو زده کړو وزارت په يوګوني ډول او پرته له دې چې د تحصيلي ارګانونو خصوصي او دولتي والی په پام کې ونيسي، په هېواد کې به د تحصيلي سکتور د علمي وړتیاوو د لوړولو له پاره خپل پروګرامونه پلي کړي.
د نوموړي د خبرو پر وړاندې د خصوصي لوړو زده کړو موسسو او پوهنتونونو ژمنه وکړه چې د تحصيلي ارګانونو د معياري او پياوړي کولو په لاره کې به د لوړو زده کړو وزارت له تقنيني اسنادو سره سم هڅې وکړي.
همداراز په دې غونډه کې د دولتي کانکور له لارې، خصوصي لوړو زده کړو بنسټونو ته د په شرایطو برابرو داوطلبانو د جذب د څرنګوالي په اړه چې ورته معرفي شوي دي خبرې وشوې.
