د ۸ تحصیلي بنسټونو د لمریزې انرژۍ سیسټم د پروژې تړون لاسلیک شو
د لوړو زده کړو اته پوهنتونونه او موسسې د یوولسو میلیونو افغانیو په ارزښت په لمریزې انرژۍ سیستم مجهزېږي.
د لوړو زده کړو وزارت تدارکاتو رییس او مالي او اداري معینیت سرپرست عبدالله صوفي زاده په دې هکله د بریالیو شرکتونو سره د هوکړه لیک په لاسلیکولو سره د لوړو زده کړو په بنسټونو کې د لمریزې برېښنا چمتو کول یوه مهمه اړتیا وبلله او ویې ویل چې د دې پروژې په پلي کېدلو سره به د نورستان، زابل، کندهار، فراه، پکتیا، دایکندي، بلخ او هلمند تحصیلي بنسټونو د برېښنا انرژۍ کمښت ستونزه به هواره شي.
د دې پروژې په تړون کوونکو یې ټينګار وکړ چې د تدارکاتو قانون، وخت بندۍ او د هوکړه لیک په متن کې د درج شویو مادو له مخې به خپل کار بشپړوي او لوړو زده کړو وزارت ته به یې وسپاري.
