د لوړو زده کړو وزارت علمي معین دوکتور لطف الله خیرخواه او ورسره مل پلاوي د شیخ زاید (خوست) پوهنتون د کادري
۱۴۴۳/۱۱/۹
۱۴۰۱/۳/۱۹
د لوړو زده کړو وزارت علمي معین دوکتور لطف الله خیرخواه او ورسره مل پلاوي د شیخ زاید (خوست) پوهنتون د کادري ازموینې د څارنې تر څنګ په دغه پوهنتون کې یو شمېر پروژې هم پرانیستلې.
د شیخ زاید (خوست) پوهنتون د ژورنالېزم او عامه اړیکو پوهنځی، د شیخ زاید راډیو، د کرنې پوهنځی د څېړنیز فارم، حیواني کلنیک او تدریسي روغتون د پروژو په پرانیسته کې د یاد پوهنتون مشرتابه، استادانو، محصلانو، اداري کارکوونکو، د خوست ولایت مقام استازو او د رسنیو استازو ګډون کړی و.
د لوړو زده کړو وزارت علمي معین دوکتور لطف الله خیرخواه له کادري ازموینې څخه د څارنې پر مهال، د کادري ازموینې ګډونوالو ته د ازموینې د روڼتیا په اړه ډاډ ورکړ او ورته ویې ویل، چې په ازموینه کې د هېڅ ډول درغلی امکان نشته.
همدارنګه د لوړو زده کړو وزارت علمي معین د شیخ زاید (خوست) پوهنتون د پروژو د پرانیستې پر مهال په خپلو خبرو کې وویل، چې دغه پروژې به په عملي برخو کې د خلکو لپاره خدمات وړاندې کوي او یادې پروژې یې د محصلینو د عملي کارونو لپاره ډېرې ګټورې وبللې. دغه راز نوموړي د شیخ زاید تدریس روغتون د خوستوالو لپاره ګټور وباله او ویې ویل، چې په دغه روغتون کې به د محصلینو د عملي کارونو تر څنګ د ناروغانو درملنه کېږي.
وروسته د شیخ زاید (خوست) پوهنتون رئیس انجنیر همایون معاویه او د دغه پوهنتون نورو مسؤلانو د یادو پروژو له پرانیستلو خوښي څرګنده کړه او ژمنه یې وکړه، چې له یادو پروژو به د شیخ زاید (خوست) پوهنتون د محصلینو د عملي کارونو او عامه خلکو ته د خدمت وړاندې کولو په برخه کې اعظمي ګټه اخلي.
د یادولو وړ ده، چې په پای کې د خوست ولایت فعالو ځوانانو له لوري د لوړو زده کړو وزارت علمي معین او د شیخ زاید (خوست) پوهنتون رئیس ته د ویاړ لونګۍ ور پر سر کړل شوې.
