د ننګرهار، لغمان او نورستان پوهنتونونو د اسلامي ثقافت بستونو لپاره ازموینه واخیستل شوه.
یاده ازموینه د لوړو زده کړو وزارت او ننګرهار پوهنتون د ګډ هیئت له خوا د ننګرهار، لغمان او نورستان پوهنتونونو د اسلامي ثقافت ۳۱ بستونو لپاره د ۱۹۸ تنو کاندیدانو څخه واخیستل شوه.
د لوړو زده کړو وزارت علمي معین دوکتور لطف الله خیرخواه د ازموینې د اخیستلو پر مهال ګډونوالو ته ډاډ ورکړ، چې د ننګرهار پوهنتون د ازموینې اخیستونکي هیئت سره په ګډه یې د ازموينې د روڼتیا او شفافیت په برخه کې امکان تر حده هلې ځلې کړي دي.
نوموړي د ازموینې پروسې په اړه کاندیدو علماوو ته معلومات ورکړل او زیاته یې کړه، چې ازموینه به په تمامه معنی شفافه واخلي او د عدالت له مخې به حق حقدار ته وسپاري.
د اسلامي ثقافت د کادري بستونو یاده ازموینه په درېو پړاونو (ژبې، تحریري او تقریري) کې واخیستل شوه، چې د ۱۹۸ تنو کاندیدانو له منځه ۳۱ تنه یې یادو بستونو ته بریالي او اوس یې د کنفرانسونو لړۍ دوام لري.
