د لوړو زده کړو وزارت مالي او اداري معین د پاکستان د «CPSP» کالج له رئیس او مل پلاوي سره وکتل.
د لوړو زده کړو وزارت مالي او اداري معین مولوي حافظ محمد حامد حسیب په داسې حال کې چې د مرکزي څانګو او تدریسي روغتونونو یو شمېر رئیسانو هم حضور درلود، د پاکستان د «CPSP» کالج له رئیس او مل پلاوي سره وکتل او افغانستان سره یې د ياد کالج، په ځانګړي ډول د لوړو زده کړو په برخه کې د همکاريو اړوند خبرې وکړې.
د لوړو زده کړو وزارت مالي او اداري معین یاد پلاوي ته د ښه راغلاست ویلو ترڅنګ د لوړو زده کړو وزارت د طبي او تدريسي روغتونونو په اړه معلومات ورکړل او ويې ويل، چې افغانستان له نږدې نيمې پېړۍ راهيسې له ګڼو ستونزو سره مخ و چې په پايله کې يې زیربناوو ته ډېر زیان رسېدلی دی.
هغه زیاته کړه، چې له نېکه مرغه افغانستان له تحولاتو وروسته د خپلو ستونزو حل لپاره پروګرامونه او پلانونه په لاس کې لري او په دې برخه کې د ګاونډي هېواد پاکستان په ګډون د یو شمېر هېوادونو همکارۍ ته اړتیا لري. نوموړي له ياد پلاوي وغوښتل، چې د طب په برخه کې له دغه وزارت سره همکاري وکړي.
ورپسې د پاکستان د «CPSP» کالج رئیس پروفیسور ډاکټر محمد شعیب شفیع د یوه پریزنټیشن پر مټ، د یاد کالج په اړه مفصل معلومات ورکړل او ویې ویل چې دوی د افغان ډاکټرانو د تخصص او په افغانستان کې د یاد کالج د نمایندګۍ دفتر د جوړولو په برخه کې همکارۍ ته چمتو دي.
د هغوی په وینا دا مهال په ۲۷ طبي برخو کې شاوخوا ۳۰۰ افغان ډاکټران د پاکستان په بېلابېلو ښارونو کې تخصصي زده کړې کوي او همدارنګه ۱۸ یې فارغ شوي دي.
د يادونې وړ ده چې د پاکستان د «CPSP» کالج په یاد هېواد کې د ماسټرۍ تر کچې د روغتيايي لوړو زده کړو په برخه کې يوه خپلواکه اداره ده، چې پر پاکستان سربېره په يو شمېر نورو هېوادونو کې هم خپلې نمایندګۍ لري.
نېټه: دوشنبه
۱۴۴۶ هـ ق د صفرالمظفر ۲۹ مه
۱۴۰۳ هـ ش د سنبلې ۱۲ مه
۲۰۲۴ م د سپټمبر ۲ مه
