ننګرهار پوهنتون کې اطلاعاتو ته د لاسرسي قانون په اړه د عامه پوهاوي غونډه جوړه شوه
یاده غونډه د افغانستان د روڼتیا د څار ادارې د ختیځ زون دفتر په نوښت د دغه پوهنتون د محصلانو د خدمتونو انسجام امریت د غونډو تالار کې جوړه شوې وه، چې د یادې ادارې د مسوولانو سربېره په کې د ننګرهار پوهنتون د محصلانو چارو مرستیال پوهنوال سید اکرم هاشمي او د بېلابېلو پوهنځیو استادانو او محصلینو برخه لرله.
د غونډې د پرانیستې وینا پر مهال د ننګرهار پوهنتون د محصلانو چارو مرستیال پوهنوال سید اکرم هاشمي د افغانستان د روڼتیا د څار ادارې له مسوولانو مننه وکړه چې د پوهنتون محصلینو ته یې اطلاعاتو ته د لاسرسي قانون په اړه د عامه پوهاوي پروګرام جوړ کړ.
نوموړي د یوې قانونمندې ټولنې د رامنځته کېدو لپاره د قوانینو څخه خبراوی او پوهاوی اړین شرط وباله چې په وینا یې قانون هغه مهال په ښه شکل تطبیقېدای شي چې وګړي یې په اړه پوهه او معلومات ولري.
ورپسې د افغانستان د روڼتیا د څار ادارې د ختیځ زون دفتر مسوول میران شاه لودین اطلاعاتو ته د لاسرسي قانون په اړه ترتیب کړی پرېزنټېشن وړاندې کړ او د یاد قانون په اړه یې د برخوالو محصلینو پوښتنې ځواب کړې.
