د علي اباد په تدریسي روغتون کې د داخله ناروغیو ۲۰۰ بستریزه ودانۍ د لوړو زده کړو سرپرست وزیر له لوري د پټۍ په پرې کولو سره ګټې اخیستنې ته وسپارل شوه.
په همدې تړاو جوړه شوې غونډه کې، چې د قرانکریم په مبارکو ایاتونو سره پيل شوه، د لوړو زده کړو سرپرست وزیر الحاج مولوي عبدالباقي حقاني د یادې ودانۍ په جوړېدو خوښي څرګنده کړه او ویې ویل:« اسلامي نظام مکلفیت لري، چې د خلکو دیني او دنیاوي ضرورتونه پوره کړي؛ نو په همدې موخه د لوړو زده کړو وزارت په خپل ټول توان هلې ځلې پیل کړي دي، چې د نننۍ ۲۰۰ بستریزې ودانۍ پرانېستل کېدل یې ښه بېلګه ده.»
سرپرست وزیر زیاته کړه:« موږ او تاسې ته بهرنیان دا هېواد نه جوړوي؛ نو اوس موږ مسؤلیت لرو، چې له شته امکاناتو ګټه پورته کړو او خپلو هېوادوالو ته په ریښتیني ډول خدمت ترسره کړو.»
په دغه ناسته کې، چې د لوړو زده کړو وزارت مرکزي او تدریسي روغتونونو رئیسانو، امرینو او مسؤلینو ګډون کړی وو، د کابل طبي پوهنتون رئیس پوهنیار ډاکټر فضل الرحمن رحماني، د کابل طبي پوهنتون علمي مرستیال پوهاند امرخېل او د کابل طبي پوهنتون استاد شمس الرحمن رحماني په خپل وار وار سره خبرې وکړې، د ۲۰۰ بستریز روغتون ودانۍ پر پرانیستل کېدو یې خوښي څرګنده کړه او دا چاره یې د هېواد په پرمختګ کې مهم اقدام وبللو.
د غونډې په وروستیو کې د لوړو زده کړو وزارت د دعوت او ارشاد رئیس شیخ شاکرالله وحدت له مسؤلینو او خلکو وغوښتل، چې باید خپلو اسلامي او ملي ارزښتونو ته ژمن اوسو، په اسلامي نظام کې د عبادت په نیت تر هر چا زیات کار او خدمت وکړو.
همدارنګه د نوموړي له لوري د هېواد د تحصیلي ډګر پیاوړتیا د هېواد پرمختګ او په ځان بساينې لپاره وروستۍ دعاء هم وشوه.
