د لوړو زده کړو سرپرست وزير د پخواني او جید عالم مولوي ولي الحق صديقي ديوبندي سره ولیدل او د یو مشر او صوفي عالم په توګه یې ترې لازمې مشورې واخیستې.
د لوړو زده کړو سرپرست وزیر الحاج مولوي عبدالباقي حقاني ختيځ ننګرهار ولایت کې د مولوي ولي الحق صدیقي ديوبندي سره لیدنې په موخ د هغه کور ته ورغی او د یو پخواني او صوفي عالم په توګه یې د هغه قدرداني وکړه.
محترم مولوي ولي الحق صدیقي، چې اوسمهال شاوخوا (١٠٦) یوسل او شپږ کاله عمر لري، په ١٣٢٨ هـ ش کال د هند دارالعلوم دیوبند مهتمم شیخ الاسلام حسین احمد مدني رحمه الله شاګرد و، د هغه په لاس ورکړل شوي سندونه یې د لوړو زده کړو سرپرست وزیر ته اوښودل، هغه د خپل ژوند زیاته برخه په درس او تدریس او د اسلام مبارک دین په خدمت کې تېره کړې او په دې برخه کې یې مهمې لیکنې کړي دي.
نوموړي د دوی کور ته د لوړو زده کړو سرپرست وزير الحاج مولوي عبدالباقي حقاني په ورتګ خوښي څرګنده کړه او له سرپرست وزیر سره يې د زده کړه یزې دورې خاطرې شريکې کړې او د حاکميت او مشرۍ اړوند يې لازمې مشورې ورکړې.
ښاغلی صدیقي، چې د تصوف او پخواني جید عالم په صفت ترې بېلابېل شیوخ او عالمان د احادیثو اجازه غواړي، د لوړو زده کړو سرپرست وزیر ته یې د حدیثو اجازه ورکړه او ترڅنګ یې د اسلامي نظام د ثبات او دوام لپاره دعا وکړه.
