د لوړو زده کړو سرپرست وزير شيخ الحديث مولوي نداء محمد نديم صاحب او مل پلاوي روسيې هېواد ته د سفر پر دوام، په دغه هېواد کې د افغان محصلينو سره وکتل.
د لوړو زده کړو سرپرست چې د ياد هېواد په رسمي بلنه دغه هېواد ته تللی، نن يې د يوې ناستې په ترڅ کې د افغان محصلينو ستونزې او پيشنهادونه واورېدل او د هر راز همکارۍ ژمنه يې ورسره وکړه.
نوموړي محصلينو ته په خپلو خبرو کې وويل: « تاسو په دې هېواد کې د افغانستان سفيران یاست، هڅه وکړئ چې د خپل هېواد ښه نمايندګي وکړئ، خپلو درسونو کې زیار وباسئ، څو د خپل هېواد لپاره د خير او ښه خدمت مصدر وګرځئ».
د یادونې وړ ده چې د لوړو زده کړو سرپرست وزیر به د خپل سفر پر دوام د بېلابېلو پوهنتونونو او تحصيلي بنسټونو مشرانو سره ناستې وکړي.
