د لوړو زده کړو سرپرست وزیر او ورسره مل پلاوي د ترکیې لوړو زده کړو او دیني چارو له وزیرانو سره وکتل.
۱۴۴۳/۱۱/۱۸
۱۴۰۱/۳/۲۸
د لوړو زده کړو سرپرست وزیر او ورسره مل پلاوي د ترکیې لوړو زده کړو او دیني چارو له وزیرانو سره وکتل.
د لوړو زده کړو سرپرست وزیر الحاج مولوي عبدالباقي حقا ني د ترکیې هېواد د بلنې پر اساس، د خپل رسمي سفر پر مهال په دغه هېواد کې له افغان محصلانو، د ترکیې لوړو زده کړو له وزیر ایرول اوزوار او د دیني چارو له وزیرپروفیسور دوکتور علی ارباش سره ناستې وکړې.
الحاج مولوي عبدالباقي حقا ني د ترکیې لوړو زده کړو وزیر په ملتیا د یاد هېواد د غازي پوهنتون د طب او انجینري پوهنځيو څخه لیدنه وکړه او د طب او انجنیري په برخو کې یې د دې پوهنځيو د مسؤلانو تجربې او نظرونه واورېدل.
د لوړو زده کړو سرپرست وزیر د ترکیې د دیني او مذهبي چارو له وزیر، د مرکزي دارالافتاء او بورسونو له رئیسانو سره وکتل. دغه راز افغان محصلانو ته یې د ترکیې د بورسونو له ورکړې خوښي څرګنده کړه او په دغه برخه کې یې د لا زیاتې همکارۍ غوښتنه ترې وکړه.
همدارنګه افغان پلاوي د یاد سفر پرمهال د یونس ایمرې انسټیوټوټ له رئیس کوتالمیش یالچین د هېواد په روغتیايي برخه کې د همکارۍ په موخه کتلي دي.
د یادو لیدنو پرمهال د لوړو زده کړو سرپرست وزیر د ترکیې او افغانستان ترمنځ د دیني او کلتو ګډو مشترکاتو په اړه خبرې وکړې، د افغانستان په تعلیمي او تحصیلي برخو کې یې د ترکیې نظري او عملي زده کړو، انلاین زده کړو، بورسونو، افغانستان ته د ترکیې استادانو رااستولو، د افغان استادانو د ظرفیت لوړولو په موخه ترکیې ته د سفرونو برابرولو، له افغان نړۍوال پوهنتون سره په بېلابېلو برخو کې د همکارۍ غوښتنې وکړې.
همدارنګه یاد پلاوي په ترکیه کې د افغانستان سفارت مسؤلانو او افغان محصلینو له استازو سره هم وکتل، د هغوی ستونزې یې واورېدې او د حل په موخه یې ډاډ ورکړ.
