د لوړو زده کړو سرپرست وزیر او ورسره مل پلاوي د کابل طبي پوهنتون له مختلفو برخو څخه لیدنه وکړه او د یاد پوهنتون مسؤلینو فعالیتونه، وړاندیزونه او ستونزې یې واورېدې.
د لوړو زده کړو سرپرست وزیر شیخ الحدیث مولوي نداء محمد ندیم صاحب، په داسې حال کې چې د دغه وزارت علمي معین دوکتور لطف الله خیرخواه او د طبي پوهنتون مشرتابه هم حضور درلود، د کابل طبي پوهنتون له مختلفو برخو لیدنه کړه او د یاد پوهنتون د مسؤلینو د فعالیتونو راپور، ستونزې او وړاندیزونه یې واورېدل.
د لوړو زده کړو سرپرست وزیر په دغه لیدنه کې د یاد پوهنتون د رهبري پلاوي او استادانو له فعالیتونو د مننې تر څنګ وویل چې د ا.ا.ا او لوړو زده کړو وزارت مسؤلین دې ته ژمن دي چې د هېواد د تحصیلي نظام په پرمختګ کې ونډه واخلي.
دغه راز د لوړو زده کړو سرپرست وزیر د هېواد صحي سکټور مهم وباله او ویې ویل چې لوړو زده کړو وزارت د کابل طبي پوهنتون او تدریسي روغتونونو ته ځانګړې پاملرنه کوي. نوموړي زیاته کړه چې د طبي پوهنتون او تدریسي روغتونونو د اړتیاوو پوره کولو په برخه کې به پوره هڅه وکړي.
وروسته د کابل طبي پوهنتون رئیس پوهنیار ډاکټر فضل رحمن رحماني او علمي مرستیال پوهاند دوکتور نجیب الله امرخېل د یاد پوهنتون د تاریخچې، لاسته راوړنو، امکاناتو، ستونزو او اړتیاوو په اړه معلومات وړاندې کړل.
همدارنګه د کابل طبي پوهنتون مسؤلینو د نورو وزارتونو له لوري د دغه پوهنتون د ځمکو د نیولو په اړه د لوړو زده کړو سرپرست وزیر ته معلومات ورکړل او په دې برخه کې یې د همکارۍ غوښتنه وکړه، چې د لوړو زده کړو سرپرست وزیر له لوري د ستونزو د حل ژمنه ورسره وشوه.
نېټه: یکشنبه
۱۴۴۴/۶/۸هـ.ق ۱۴۰۱/۱۰/۱۱هـ.ش ۲۰۲۳/۱/۱م
