د لوړو زده کړو سرپرست وزیر خوست ولایت کې د دیني مدارسو له مسؤلینو سره ناسته ترسره کړه.
په یاده ناسته کې د لوړو زده کړو سرپرست وزیر الحاج مولوي عبدالباقي حقاني دیني او عصري زده کړې له یوه او بل سره تړلې او د هېواد د ابادۍ او پرمختګ لپاره اړینې وبللې.
سرپرست وزیر زیاته کړه، «موږ دیني او دنیاوي اړتیاوې لرو، چې یوه برخه زموږ دیني ضرورتونه پوره کوي او بله دنیاوي. »
د خوست ولایت د دیني مدارسو مسؤلینو یاد ولایت ته د لوړو زده کړو سرپرست وزیر په ورتګ خوښي څرګنده کړه او یادونه یې وکړه، چې دوی د امکان تر بریده په دیني مدارسو کې د دیني زده کړو ترڅنګ د عصري زده کړو لپاره هم زمینه برابره کړې او له دې وروسته به په یادو برخو کې لا ډېر خدمتونه وړاندې کړي.
