د لوړو زده کړو سرپرست وزیر د بامیانو والي سره د هغه په کاري دفتر کې ولیدل
د لوړو زده کړو سرپرست وزیر او علمي مرستیال پوهنمل عبدالتواب بالاکرزي د ولايتي سفرونو په ترڅ کې دا ځل بامیان ولایت ته ولاړ او د هغه ولایت له والي محمد طاهر زهیر سره د لیدني ترڅنګ يې په ياد ولایت کې د باميکا لوړو زده کړو خصوصي موسسې څخه هم لیدنه وکړه.
په دې ليدنه کې دواړو خواو د باميان پوهنتون پر وضعیت او د دې پوهنتون په وده کې د محلي او مرکزي ادارو پر هڅو رڼا واچوله.
د بامیان والي محمد طاهر زهیر د لوړو زده کړو وزیر او ورسره راغلي پلاوي ته د ښه راغلاست ترڅنګ داسې وویل: «ښاغلی وزیر صاحب مننه چې بامیان ولایت ته مو د مهمو پروژو د پرانستلو لپاره تشریف راوړئ، دغه پروژې د بامیان د خلکو لپاره ډېرې حياتي او ګټورې دي.»
د لوړو زده کړو سرپرست وزیر او علمي مرستیال پوهنمل عبدالتواب بالاکرزي په خپلو خبرو کې وویل، چې د افغانستان په مرکزي برخه کې بامیان پوهنتون یو له سترو پوهنتونو څخه دی چې په دې ساحه کې د نورو تحصیلی بنسټونو لپاره د مور پوهنتون حیثیت لري.
نوموړي همداراز د لوړو زده کړو وزارت کړنو ته په اشارې سره وويل: «اوسمهال لوړو زده کړو وزارت د کمیت پرځای کیفیت ته مخه کړې، چې له نیکمرغه په تېرو دوو کلونو کې زموږ ټولې پاليسۍ کیفیت محوره او د پوهنتونو اساسي اړتياو ته پاملرنه وه.»
د یاد سفر په جریان کې د لوړو زده کړو سرپرست وزیر او مل پلاوي د بامیانو ولایت له يواځینۍ خصوصي تحصیلي موسسې بامیکا څخه هم لیدنه وکړه.
د لوړو زده کړو وزیر د بامیکا خصوصي تحصيلي موسسې رهبري ته لارښوونه وکړه، چې د علمي کادر غړو د جذب لایحې د تطبیق، د کیفیت د تضمين په پروسه کې د داخليدو او د استادانو د شغلي مصؤنیت په برخه کې دې جدي پاملرنه وکړي.
د یادونې وړ ده چې د بامیانو والي ښاغلي زهیر له کابل څخه بامیانو ته د تللي پلاوي د درناوي په موخه یوه فرهنګي غونډه او میلمستیا چمتو کړې وه، چې د یاد ولایت یو شمېر ځوانانو او فرهنګپالو پکې د شعرونو په لوستلو او د محلي موسیقۍ په غږولو سره د ګډونوالو ادبي تنده خړوبه کړه.
باید وویل شي، چې د لوړو زده کړو سرپرست وزیر ښاغلي بالاکرزي ولایتي سفرونه ادامه لري او راتلونکې اونۍ به د یوه بل ولایت د پوهنتونو وضعیت له نږدې وڅاري.
