د لوړو زده کړو سرپرست وزیر سره په افغانستان د ترکیې سفیر مرستیال چنګېز او ترکیې معارف فونډېشن د منځنۍ اسیا مسؤل رمضان د ګډې همکارۍ په موخه ناسته ترسره کړه.
د لوړو زده کړو سرپرست وزیر الحاج مولوي عبدالباقي حقاني په دې ناسته کې له یاد پلاوي د هېواد تحصیلي ډګر پیاوړتیا په برخه کې د همکارۍ غوښتنه وکړه.
دغه راز ښاغلي حقاني له دوی وغوښتل، چې د ترکیې له لوري د هغو ښوونځيو فارغانو ته، چې دوی یې ملاتړي دي، یو ځانګړی پوهنتون جوړ کړي؛ ترڅو له فراغت وروسته دغه فارغان په هغه پوهنتون کې لوړې زده کړې ترسره کړي.
راغلي پلاوي د لوړو زده کړو سرپرست وزیر الحاج مولوي عبدالباقي حقاني ته د یادو غوښتنو او د هېواد تحصیلي پیاوړتیا په برخه کې د هر اړخېزې همکارۍ ډاډ څرګند کړ.
