د لوړو زده کړو سرپرست وزیر په مشرۍ د خصوصي لوړو زده کړو کمیسیون ناسته وشوه
د یادې ناستې په پیل کې د لوړو زده کړو سرپرست وزیر محترم شیخ الحدیث مولوي نداء محمد ندیم د خصوصي تحصیلي بنسټونو د تحصیلي چارو پر کیفیت لوړونه ټینګار وکړ او هغه یې د هېواد د تحصیلي نظام په پیاوړتیا کې مهم وبلل.
وروسته له اجنډا سره سم د کمیسیون د غړو له لوري د یو شمېر خصوصي تحصیلي بنسټونو د پوهنځیو او څانګو نوي ایجاد غوښتنو، له یوه ځای څخه بل ځای ته د نقل مکان، د امناء پلاوي تائید، د جواز تمدید او دې ته ورته موضوعاتو په اړه بحثونه او لازمې پرېکړې وشوې. دغه راز یو شمېر موضوعات له تائید وروسته د نهایي پرېکړې په پار، عالي شورا ته ولېږدول شول.
د یادونې وړ ده چې د خصوصي لوړو زده کړو کمیسیون د یادو بنسټونو د ستونزو حل، پرمختګ او معیاري کولو په موخه جوړ شوی، چې د لوړو زده کړو وزارت معین صاحبان، د مقام سلاکاران، د مرکزي ادارو یو شمېر رئیسان او د مرکزي امارتي پوهنتونونو رئیسان یې غړیتوب لري.
نېټه: چهارشنبه
۱۴۴۶هـ.ق، د جمادی الاول ۱۱مه
۱۴۰۳هـ.ش، د عقرب ۲۳مه
۲۰۲۴م، د نومبر ۱۳مه
