د لوړو زده کړو وزارت د دیني جامعاتو او تخصصاتو عمومي ریاست د یوې غونډې په ترڅ کې د دې ریاست کارکوونکو ته د کاري طرزالعملونو او د فاضلانو فورمونو د طی مراحل په اړه معلومات ورکړل.
ياده شوې غونډه د قرانکریم د څو مبارکو اياتونو په تلاوت سره پيل شوه.
ورپسې د لوړو زده کړو وزارت د دیني جامعاتو او تخصصاتو عمومي رئیس مولوي سیف الدین حماد وویل، چې د دا ډول غونډو له جوړولو څخه یې موخه د اسنادو د ارزونې له بهیرونو او کاري طرزالعملونو سره د کارکوونکو اشنا کول دي.
دغه راز په ياده غونډه کې د سندونو د ارزونې رئيس مولوي دُراللّٰه ، د اسنادو د ويش او او د سوابقو تنظیم رئیس مولوي سيف الرحمن شينواري او د دیني جامعاتو او تخصصاتو عمومي ریاست د جامعاتو او تخصصاتو ایجاد رئيس مولوي اسدالله فريد، هر يو په خپل وار سره د کاري پروسیجرونو پلي کولو څرنګوالي په اړه معلومات وړاندې کړل.
دغه راز د لوړو زده کړو وزارت د بشري سرچینو رياست د ظرفيتونو د لوړولو امر عبيدالله مولايي د اداري پروسې او د فاضلانو فورمونو د طی مراحل په اړه مفصل او هر اړخيز معلومات وړاندې کړل او د ګډونوالو پوښتنو ته يې ځوابونه وويل.
تمه ده چې په راتلونکو ورځو کې به هم ورته غونډې جوړې شي.
