د لوړو زده کړو وزارت رهبري شورا ناسته، د دغه وزارت سرپرست وزیر الحاج مولوي عبدالباقي حقاني په مشرۍ تر سره شوه.
۱۴۴۴/۱/۱۲
۱۴۰۱/۵/۱۹
د لوړو زده کړو وزارت رهبري شورا ناسته، د دغه وزارت سرپرست وزیر الحاج مولوي عبدالباقي حقاني په مشرۍ تر سره شوه.
د ناستې په پیل کې د لوړو زده کړو سرپرست وزیر د اسلامي امارت له حاکمیت وروسته د تېر یوه کال کړنو او لاسته راوړنو ته اشاره وکړه، د تېر یوه کال نیمګړتیاوې یې په ګوته او په راتلونکي کې یې د نه تکرار په موخه اړوندو مسؤلانو ته سپارښتنې وکړې.
وروسته له اجنډا سره سم د رهبري شورا غړو د دولتي تحصیلي بنسټونو د معیاري کولو او خصوصي تحصیلي سکټور پر اصلاح، د افغانستان د کرنیزو علومو او ټکنالوژۍ ملي پوهنتون (انستو) د ډیپلوم فارمټ، د تحصیلي مشورتي خصوصي شرکتونو د فعالیت پر څرنګوالي او ځينو نورو موضوعاتو هر اړخیز بحثونه او له قوانینو سره سمې پرېکړې وکړې.
همدارنګه د ځينو موضوعاتو د څېړنې لپاره کمېټې رامنځته شوې، چې د اړوندو موضوعاتو په اړه کره معلومات راټول او په راتلونکې رهبري شورا کې یې وړاندې کړي او ناسته د خیر په دعا سره پای ته ورسېده.
