د لوړو زده کړو وزارت رهبري شورا ناسته، د لوړو زده کړو سرپرست وزیر شیخ الحدیث مولوي ندامحمد ندیم صاحب په مشرۍ د دغه وزارت د محصلانو چارو معین، مالي او اداري معین ، مرکزي رئیسانو او د مرکزي پوهنتونونو رئيسانو په ګډون، تر سره شوه.
دغه راز سرپرست وزیر صاحب زیاته کړه:« د وزارت تر چتر لاندې ټول دولتي مسؤلین او کارکوونکي باید خپل فکر، سیرت او صورت د اسلامي اصولو سره سم برابر کړي او داسې کړنې ترسره نه کړي، چې د اسلام مبارک دین سره په ټکر کې اوسي.»
له اجنډا سره سم، د شورا غړو له لوري، په پوهنتونونو او تحصیلي مؤسسو کې د دارالعلوم فارغانو د شمولیت، د هغو علمي کادري غړو چې په بهر کې یې زده کړې بشپړې کړې تقرر، د خصوصي تحصیلي بنسټونو له لوري له ظرفیت څخه د ډېرو محصلانو جذب، د ځینو لغوه شویو تحصیلي بنسټونو د محصلینو برخلیک، د دولتي او خصوصي پوهنتونونو د اسنادو(ټرانسکریپټ) فارمټ واحد کولو په شمول بېلابېل موضوعات شریک شول، چې د شورا غړو لخوا د ځینو موضوعاتو حل په موخه پلاوي وټاکل شول او پر ځینو موضوعاتو بحثونه ترسره، نظرونه شریک او لازم تصمیمونه ونیول شول.
نېټه: چهار شنبه
۲۱/۴/۱۴۴۴ هـ.ق ۲۵/۸/۱۴۰۱ هـ.ش ۲۰۲۲/۱۱/۱۶
د لوړو زده کړو وزارت مطبوعاتي دفتر
