د لوړو زده کړو وزیر د خاتم النبیین پوهنتون په علمي باور جشن کې ګډون وکړ
لوړو زده کړو وزارت باید پر ټولو سکټورونو خپل رول او اغېزه د څېړنې او پوهې له لارې وښيي.
دغه خبره د لوړو زده کړو وزیر د خاتم النبیین پوهنتون علمي باور ورکولو جشن په مراسمو کې وکړې.
د لوړو زده کړو وزیر د خاتم النبیین پوهنتون مشرتابه د علمي باور ورکولو د سند تر لاسه کولو له امله مبارکي وویله او د لوړو زده کړو بنسټونو پر وړاندې یې د لوړو زده کړو وزارت لیدلوري څرګند کړ. دغه راز زیاته یې کړه چې د علمي باور تر لاسه کول، پوهنتونونه دې ته تیاروي، څو د خپل پرمختګ پروګرامونه په جدي توګه وڅاري.
هغه له علمي بنسټونو سره د کیفیت لوړولو په برخه کې د لوړو زده کړو وزارت ژمنې ته اشاره وکړه او ویې ویل، چې زده کړې به د وخت له غوښتنو او نویو معیارونو سره سمې تعریف کړي او همدارنګه زده کړې به د حفظ کولو له محور څخه د څېړنې محور ته راولي.
دوکتور عباس بصیر ټینګار وکړ، چې څېړنه او د فکر رامنځته کول په اکاډمیکو کړنو کې یو اړین عنصر دی او لوړو زده کړو وزارت هڅه کوي، څو د لوړو زده کړو بنسټونو علمي څېړنې د نوښت او تخلیق لامل شي.
د خاتم النبیین پوهنتون مشر دوکتور محمد وحید بینش د دغه پوهنتون د زده کړو د موخو په اړه خبرې وکړې او ویې ویل چې د علمي اثارو رامنځته کول د علمي معیارونو په مراعاتولو سره د پوهې او کلتور عامول او له هلکانو سره سم، تر ۵۰سلنې د نجونو جذب زموږ له لاسته راوړنو څخه دي.
دوکتور بینش زیاته کړه چې خاتم النبیین علمي بنسټ تل درس او څېړنه سره یو ځای کړي دي او هڅه کوي څو د معتبرو زده کړو د چاپېریال برابرولو له لارې د ټولنې تمې په سمه توګه پوره کړي.
