علمي – څېړنیز کنفرانس (د هېواد اوسنی وضعیت، فرصتونه او ننګونې) تر عنوان لاندې د ا.ا.ا لوړ پوړو چارواکو، څېړونکو، استادانو او محصلینو په ګډون په کابل پوهنتون کې تر سره شو.
په دې کنفرانس کې د لوړو زده کړو وزارت سرپرست الحاج مولوي عبدالباقي حقاني د هېواد د ستونزو او ننګونو په حل کې د تحصیلي بنسټونو د رول په اړه خبرې وکړې او ویې ویل،
دا چې د افغانستان مجاهد ولس د خپلو اسلامي او ملي ارزښتونو د خوندي کولو لپاره له تېرو څلورو لسیزو څخه زیاته مبارزه وکړه او دوی وکولای شول چې خپله خپلواکي ترلاسه کړي؛ خو له خپلواکۍ وروسته هم له ننګونو او ستونزو سره مخ دي، چې د له منځه وړلو لپاره یې د تحصیلي بنسټونو او د هېواد علمي کادري غړو رول مهم دی.
هغه زیاته کړه، د دغه نظام د بنسټونو د ټینګښت او د اقتصادي ستونزو د حل په موخه د هېواد تحصیلي بنسټونو ته اړتیا ده، چې د ځوانو کادري غړو په روزلو او له کاني زیرمو څخه په ګټې اخیستنې سره افغانستان د خودکفايۍ پر لور بوځي.
د لوړو زده کړو وزارت سرپرست د دغه کنفرانس له تنظیموونکو مننه وکړه او د هېواد په نورو تحصیلي بنسټونو کې یې د ورته کنفرانسونو په جوړولو ټینګار وکړ.
ورپسې د ا.ا.ا ویاند ذبیح الله مجاهد د نظام د بنسټ د پیاوړتیا او د شته ننګونو په حل کې د خلکو د همکارۍ په اړه خبرې وکړې.
هغه زیاته کړه، له جګړې وروسته په افغانستان کې ډېرې ننګونې او فرصتونه شته، چې د نظام او خلکو په همکارۍ او ګډو هڅو سره حل کېدای شي او په شته فرصتونو کې سراسري امنیت، یو واحد نظام، طبیعي زېرمې او نور شامل دي، چې کولی شي افغانستان د پرمختګ او ترقۍ پر لور بوځي.
دغه راز په ياد شوي کنفرانس کې د کابل پوهنتون رئيس دوکتور اسامه عزيز، د ټولنې د ستونزو په حل کې د تحصيلي بنسټونو د علمي او څېړنيزو فعاليتونو د ارزښت په اړه، د هېواد د حقوقي چارو کارپوه عبدالستار سعادت د حکومتوالۍ ، له جنګ وروسته هېوادونو، د قانون حاکمیت او د خپلواکۍ مفاهیمو، د افغان رسنۍ او څیړنیز مرکز بنسټ ایښودونکي عبدالجبار بهیر د ننګونو، د ا.ا.ا رسمیت پېژندلو، یو شمیر استادانو او ګډونوالو د یادې موضوع په اړه خبرې وکړې او خپلې علمي مقالې یې ولوستلې.
