ننګرهار پوهنتون کې د کمال خان بند د ارزښت په اړه یو ورځنی علمي سیمینار جوړ شو
ننګرهار پوهنتون کې د کب په ۲۴مه د کمال خان بند د اقتصادي، محیطي او ټولنیز ارزښت او د سیمې پر کرنه او اقلیم یې اغېزې تر سرلیک لاندې یو ورځنی علمي سیمینار جوړ شو.
په دغه علمي سیمینار کې د ننګرهار پوهنتون مشر پوهاند دوکتور خلیل احمد بهسودوال، د علمي چارو مرستیال پوهندوی دوکتور محمد حامد کډوال، د محصلانو چارو مرستیال پوهنوال سید اکرم هاشمي، د بېلابېلو پوهنځیو او تدریسي روغتون مشرانو، استادانو او محصلینو برخه لرله.
د سیمینار د پرانيستې وينا پر مهال د ننګرهار پوهنتون مشر پوهاند دوکتور خلیل احمد بهسودوال وويل:" د خوښۍ ځاى دى چې نن ننګرهار پوهنتون د هېواد د يوې سترې ملي پروژې د ارزښت د بیان کوربه دی."
نوموړي زیاته کړه چې د هېواد د اوبو سالم مدیریت او په دې برخه کې د شته فرصتونو څخه په سمه توګه ګټه اخیستنه به افغانستان د وزګارۍ، بېوځلۍ او لوږې له ناورینونو وژغوري او د نړۍ د بډای او پرمختللو هېوادونو په کتار کې ودروي.
پوهاند بهسودوال د پوهنتون د بېلابېلو پوهنځیو له استادانو مننه وکړه، چې د اوبو د مدیریت او د کمال خان بند د ارزښت په اړه یې څېړنې کړي او مقالې يې لیکلي چې په دغه سیمینار کې د وړاندې کېدو سربېره به د اوبو د تنظیم ملي ادارې او نورو اړوند ارګانونو سره هم شریکې شي.
د سيمينار په دويمه برخه کې د ننګرهار پوهنتون د اقتصاد، کرنې، انجنیري او شرعیاتو پوهنځيو استادانو پوهاند محمد بشیر دودیال، پوهاند دوکتور اسرارالحی منیب، پوهنوال حمدالله نظامي، پوهنمل نور اغا نوښت، پوهنیار عبدالرحمن درد او پوهنیار رحمت الله وحدت یار د کمال خان بند تاریخچه، د اوبو اهمیت د اسلام له نظره د اوبو اقتصادي رول، پلان او مدیریت، د سیمې (نیمروز) د کرنې په وده کې د کمال خان بند د اوبو اغېزې، د هېواد په اقتصادي، ټولنیزې، او محیطي پراختیا کې د کمال خان بند ونډه او د سیمې پر اقلیم د کمال خان بند اغېزې تر سرلیکونو لاندې مقالې او څېړنې وړاندې کړې او د اړوند موضوعاتو په اړه یې د ګډونوالو پوښتنې ځواب کړې.
