په کابل پولي تخنیک پوهنتون کې د لوړو زده کړو وزارت د دعوت او ارشاد ریاست له لوري د دغه پوهنتون په همکارۍ د محصلینو تر منځ د سیرت النبی ﷺ سیالۍ پیل شوې.
د یادې سیالۍ په پرانیسته کې د لوړو زده کړو وزارت د دعوت او ارشاد رئیس او ورسره پلاوي، د کابل پولي تخنیک پوهنتون مشرتابه او د دغه پوهنتون محصلینو ګډون کړی و.
د ناستې په پیل کې د لوړو زده کړو وزارت د دعوت او ارشاد رئیس شیخ شاکرالله وحدت د نبي کریم ﷺ پر شخصیت، کړنلارو او اخلاقو خبرې وکړې. نوموړي د رسول الله صلی الله علیه وسلم سیرت د ټولو مسلمانانو لپاره نمونه وباله او ټولو محصلینو ته یې سپارښتنه وکړه چې د ژوند په هره برخه کې د رسول الله صلی الله علیه وسلم له سیرت څخه پیروي وکړي.
شیخ شاکرالله وحدت د سیرت النبي ﷺ پر ارزښت د خبرو تر څنګ، دا ډول سیالۍ مهمې او اغېزناکې وبللې او د یادې سیالي په اړه یې هر اړخیز معلومات وړاندې کړل.
د یادولو وړ ده چې په دغه سیالۍ کې یوازې د کابل پولي تخنیک پوهنتون محصلین او کارکوونکي ګډون کولی شي، چې د نوملیکنې پروسه یې نن شبنه، د روان کال د تلې په ۱۶مه پیل او د نوملیکنې له پروسې وروسته به یې ازموینه واخیستل شي.
