د لوړو زده کړو سرپرست وزیر د فدراتیف روسیې د لوړو زده کړو او پوهنې وزیرانو دویمې نړیوالې غونډې په څنډه کې د تاتارستان هېواد د علماوو شورا له رئیس سره وکتل.
د لوړو زده کړو سرپرست وزیر شیخ الحدیث مولوي نداء محمد ندیم، په داسې حال کې چې د ا.ا.ا د پوهنې سرپرست وزیر مولوي صاحب حبیب الله آغا هم حضور درلود، د تاتارستان هېواد د علماوو شورا له رئیس سره د لیدنې پر مهال د امیرالمؤمنین حفظه الله تر واحد قیادت لاندې د ا.ا.ا د اسلامي نظام په اړه معلومات ورکړل او ویې ویل: «اوسمهال افغانستان امن دی، شریعت پکې تطبیق کېږي او نظام له خلکو سره له شفقت او ترحم څخه کار اخلي.»
د تاتارستان هېواد د علماوو شورا رئيس شیخ رستم عبدالحی د لوړو زده کړو له سرپرست وزیر سره پر لیدنې خوښي وښوده د خپل هېواد د روان حالت په اړه یې معلومات ورکړل او ویې ویل چې اوس دلته تر پخوا د مسلمانانو حالت ښه شوی، مسلمانان خپلې دیني ازدۍ لري او د علماوو شورا د حنفي فقې په رڼا کې خپلې چارې پر مخ وړي.
نوموړي د خپلو خبرو پر دوام وویل: «په مصر هېواد کې مې چې کله زده کړې کولې، له افغاني علماوو څخه مې د فقې کتابونه لوستي، زه د افغانستان علماء کرام د خپلو استادانو په حیث پېژنم.»
د یادونې وړ ده چې د لوړو زده کړو او پوهنې سرپرست وزیران د یوه پلاوي په ملتیا تېره ورځ «د لوړو زده کړو او پوهنې وزیرانو دویمه نړیواله غونډه» کې د ګډون په موخه د فدراتیف روسيې کازان ښار ته سفر وکړ.
هېره دې نه وي چې په یاده لیدنه کې د لوړو زده کړو او پوهنې سرپرست وزیرانو د تاتارستان هېواد د علماوو شورا رئيس او غړو ته دعوت ورکړ، چې افغانستان ته راشي او د اسلامي امارت نظام له نیږدې وګوري.
