د تخار پوهنتون د استادانو، کارکوونکو او مامورينو د ښارګوټي د بنسټ ډبره کېښودل شوه
دغه ښارګوټی د تخار ولايت له لويو پروژو ګڼل کېږي چې د تخار پوهنتون په ملکیت کې جوړېږي.
د تخار پوهنتون د استادانو، کارکوونکو او مامورينو د اوسېدو ښارګوټی، د قانوني پړاوونو او ولسمشر د منظورۍ په اخيستو سره د پلي کیدو پړاو ته رسېدلی چې اوس يې د بنسټ ډبره کېښودل شوه.
د دې ښارګوټي د بنسټ ډبرې په ایښودو کې د تخار پوهنتون رييس پوهندوی خيرالدين خيرخواه، د تخار ولايت والي مولوي عبدالله قرلق، د ولايتي شورا رييس وفی الله رحماني، د ښار جوړولو چارو رييس انجنير عزیز الرحمن رحماني، د علماوو شورا رييس مولوي عبدالصمد محمدي، د دولتي ادارو رييسانو، د پوهنتون مشرتابه او مرستيالانو، د تخار د خصوصي لوړو زده کړو بنسټونو مسولينو، د پوهنتون استادانو او کارکوونکو، د مدني ټولنې غړو، قومي مشرانو او نفوذ لرونکو شخصيتونو، ځوانانو او خبريالانو ګډون کړی و.
د دې پروژې په پلي کېدو سره به تخار يو معياري ښارګوټی ولري چې په هغې کې به ټول ښاري اصول او امکانات په پام کې نيول شوي وي.
