د لوړو زده کړو وزارت مرکز او ټولو امارتي تحصیلي بنسټونو مالي او تدارکاتي چارو مسؤلینو لپاره پنځه ورځنی ورکشاپ پای ته ورسېد. 

په یاد ورکشاپ کې د مرکزي ادارو او د امارتي تحصیلي بنسټونو رئیسانو، مرستیالانو، د مرکز او تحصیلي بنسټونو د مالي او تدارکاتي چارو کارکوونکو ته د استادانو او متخصصینو له لوري د عامه بودیجې، مالي سیاستونو، تدارکاتي پړاوونو، تدارکاتي پلان جوړونې، معیاري فورمو، د داوطلبۍ پروسو او دېته ورته نورو موضوعاتو په اړه روزنه ورکړل شوه. 
د ورکشاپ ګډونوالو په وینا؛ په تېرو پنځو وروځو کې مو د خپلې دندې اړوند ډېر مهارتونه تر لاسه کړل، چې په عملي کولو سره به یې د تحصیلي نظام په مالي او تدارکاتې چارو کې روڼتیا او چټکتیا رامنځ ته شي. 
همدارنګه په دغه ورکشاپ کې د شیوخ کرامو له لوري اصلاحي بیانونه وشول او د بیت المال پر ارزښت یې خبرې وکړې. 
دغه راز د یاد ورکشاپ په پنځمه ورځ په تحصیلي بنسټونو کې د علمي او محصلانو چارو اړوند پر ستونزو او د هغو پر حلارو خبرې وشوې او په دې برخو کې د وزارت مرکزي ادارو او دویمي واحدونو تر منځ د لا ډېرې همغږۍ پر رامنځ ته کولو ټينګار وشو. 
په پای کې د لوړو زده کړو وزیر او مشرتابه پلاوي له ټولو ګډونوالو څخه د مننې تر څنګ، د چارو د غوره والي په پار لازمې لارښوونې او سپارښتنې وکړې.