د شهید استاد رباني د ښوونې او روزنې پوهنتون په ادبیاتو پوهنځي کې د «پوسټر پرېزېنټېشن» په نامه نندارتون جوړ شو
دغه نندارتون د زدکړیالانو په نوښت او د ژبو او ادبیاتو پوهنځي د مشر نورمحمد احمدزي په مرسته د ادبیاتو پوهنځي لخوا جوړ شو چې پښتو، دري، عربي، انګرېزي، روسي او ترکي څانګو زدکړیالانو پکې ګډون کړی و او خپل موضوعات یې نندارې ته وړاندې کړل.
په دغه نندارتون کې د پښتو څانګې زدکړیالانو د پښتو ژبې د پنځو ستورو پوهاند علامه عبدالحی حبیبي، علامه قیامالدین خادم، استاد عبدالرؤف بېنوا، استاد ګل پاچا الفت او پوهاند صدیقالله رښتین په اړه معلومات او د دري څانګې زدکړیالانو د لوی عرفاني شخصیت او شاعر مولانا جلالالدین محمد بلخي په اړه معلومات چمتو کړي ول او د نندارچیانو پوښتنو ته یې ځوابونه وویل.
همدارنګه د عربي څانګې زدکړیالانو د عربي ژبې د پیدايښت، د انګرېزي څانګې زدکړیالانو د لنډې کیسې، د روسي څانګې زدکړیالانو د الکسانډر پوشکین او د ترکي څانګې زدکړیالانو د ترکي ژبې د لاتین کېدو په اړه چمتو شوي معلومات وړاندې کړل.
له دغه نندارتون څخه د شهید استاد رباني د ښوونې او روزنې پوهنتون مشرې پوهنوالې لیلما شریفي یما، علمي مرستیال پوهاند جمشېدخان رشیدي، د ژبو او ادبیاتو پوهنځي مشر پوهاند نورمحمد احمدزي، استادانو او ګڼ شمېر زدکړیالانو لیدنه وکړه او د یاد نندارتون له چمتو کوونکو یې مننه وکړه .
د یاد پوهنتون مسوولینو په وینا دغه نندارتون د ادبیاتو پوهنځي د بېلابېلو څانګو تر منځ د علمي او اکاډمیکو همکاریو د لا غښتلتیا په موخه جوړ شوی دی.
