د لوړو زده کړو سرپرست وزیر په خپل کاري دفتر کې د نیمروز له والي سره ولیدل او د یاد ولایت په تحصیلي حالت یې تفصیلي خبرې وکړې
په دغه لیدنه کې د لوړو زده کړو سرپرست وزیر او علمي مرستیال پوهنمل عبدالتواب بالاکرزي، په هیواد کې د لوړو زده کړو وزارت پراختیایې پروګرامونو او پلانونو، په ځانګړې توګه د پوهنتونو د تشکیلاتو د کمښت، د نویو ساختمانونو جوړولو او د ځوانو استادانو د ظرفیت لوړولو په اړوند معلومات وړاندې کړل.
نوموړي وویل د هیواد د لوړو زده کړو بنسټونو د علمي کادر او اداري غړو تشکیل تر نهایی کېدو وروسته د اداري اصلاحاتو مستقل کمیسیون ته لیږل شوی تر څو د هغوی له څیړنې او د هیواد د جمهوري ریاست مقام له منظورۍ وروسته؛ د هیواد لوړو زده کړو بنسټونه په دې وتوانیږي تر څو د روان کال د وري میاشتې دویمه نیمایې کې خپل نوي عملي کادر غړي جذب کړي چې په دې توګه به د استادانو د کمښت په برخه کې د هیواد د لوړو زده کړو بنسټونو ستونزې حل شي.
پوهنمل بالاکرزي همدا ډول د اقتصاد او کرنې پوهنځيو تشکیلاتو د مراحلو طی کولو په اړه چې د نیمروز لوړو زده کړو موسسې په چوکاټ کې یې نوي شامل شوي دي د نیمروز ولایت والي ته یې معلومات ورکړل.
وروسته د نیمروز والي ډاکټر ولي سلطان د لوړو زده کړو وزارت څخه د ستاینې په ترڅ کې د هیواد لوړو زده کړو بنسټونو ته د توجه په برخه کې، خپل یو سلسله غوښتنې او وړاندیزونه د نیمروز د لوړو زده کړو موسسې د پیاوړتیا او ودې او د ځوانو استادانو د ظرفیت لوړونې په برخه کې د لوړو زده کړو سرپرست وزیر سره شریک کړل او د یادې موسسې د لیلیې جوړولو د کارونو پرمختګ په اړه چې ټاکل شوې په شپږو طبقو کې جوړه شي هم معلومات وړاندې کړل.
د یادولو وړ ده چې د نیمروز لوړو زده کړو موسسه اوس مهال د ښوونې او روزنې پوهنځي کې (۱۸) تنه استادان او (۳۱۰) تنه (انجونې او هلکان) محصلان لري.
