د لوړو زده کړو وزارت د خصوصي محصلانو رئیس په مشرۍ د دغه وزارت پلاوي پکتیا ولایت ته د کاري سفر په ترڅ کې د پکتیا پوهنتون او زم زم خصوصي مؤسسې څخه لیدنه او څارنه وکړه.
د لوړو زده کړو وزارت د خصوصي محصلانو چارو رئیس انجنیر سید اسماعیل روحاني په مشرۍ د دغه وزارت یوه پلاوي د پکتیا پوهنتون علمي، اداري، تدریسي او د محصلانو چارو څارنه او ارزونه وکړه.
یاد پلاوي د پکتیا پوهنتون له استادانو او محصلینو سره د ناستې پر مهال د هغوی ستونزې واورېدې او د حل په برخه کې یې ژمنې ورسره وکړې. همدا راز نوموړي پلاوي د لوړو زده کړو وزارت پر قوانینو او طرزالعملونو د ټينګار تر څنګ، محصلین تقواء، درسونو او یووالي ته تشویق کړل.
همدارنګه دغه پلاوي په پکتیا کې د زم زم خصوصي تحصیلي مؤسسې د مختلفو برخو د ارزونې تر څنګ، د یاد تحصیلي بنسټ مسؤلانو ته د ملي او اسلامي ارزښتونو د مراعاتولو په برخه کې لازمې سپارښتنې وکړې.
د یادولو وړ ده چې په دغه سفر کې د لوړو زده کړو وزارت د دعوت او ارشاد رئیس شیخ شاکرالله وحدت او د بشري سرچینو رئیس مفتي عبدالکریم امیري هم د خصوصي محصلانو رئیس ملتیا کوله.
