د هېواد سوېلي حوزې په کندهار پوهنتون کې د ښوونیزو بنسټونو د کیفیت د تضمین او اعتبار ورکولو معیارونو په اړه دوه ورځنی ورکشاپ جوړ شو.

۱۴۰۰کال، د مرغومې ۳۰مه
د هېواد سوېلي حوزې  په کندهار پوهنتون کې د ښوونیزو بنسټونو د کیفیت د تضمین او اعتبار ورکولو معیارونو په اړه دوه ورځنی ورکشاپ جوړ شو.
په دغه ورکشاپ کې، چې د جنوبي حوزې په اړوندو سیمو (هلمند، زابل او اروزګان) کې د دولتي او خصوصي لوړو زده کړو موسسو مسوولینو او استادانو ته د کیفیت د تضمین او اعتبار ورکولو د معیارونو د پلي کولو او پوهاوي په موخه جوړ شوی و، په کې د اعتبار ورکولو معیارونه او د هېواد د لوړو زده کړو موسسو په وده او پراختیا کې د هغې د ارزښت په اړه هر اړخيز معلومات وړاندې شول.
دغه راز د لوړو زده کړو وزارت د کیفیت د تضمین او اعتبار ورکولو سرپرست رئیس ښاغلي شاکر وحیدي په مشرۍ پلاوي  د کندهار پوهنتون له رئیس ښاغلي ډاکټر محمد زکریا امیر زاده سره هم وکتل.
په دې کتنه کې د کیفیت د تضمین او اعتبار ورکولو سرپرست رئیس یادونه وکړه، چې فکر کېده په هېواد کې له وروستیو پرمختګونو وروسته د کیفیت د تأمین او اعتبار ورکولو بهیر ودرول شي، خو برعکس د دغه وزارت د کیفیت د تضمین او اعتبار ورکولو ریاست د لوړو زده کړو وزارت په عملي اقدام او د زون په کچه د ښوونیزو ورکشاپونو په ترسره کولو سره دغه منفي انګېزه د پخوا په پرتله د زیاتو جدي اقداماتو او د هیواد د ولایتي تعلیمي ادارو په لومړیتوبونو سره مثبت لوري ته واړوله.
له بلې خوا د کندهار پوهنتون د رهبرۍ پلاوي رئیس او غړو د پوهنتون د ښوونیزو ورکشاپونو د ترسره کولو په برخه کې د لوړو زده کړو وزارت په ځانګړي ډول د کیفیت د تضمین او اعتبار ورکولو ریاست د پوره پاملرنې ستاینه وکړه او ټینګار یې وکړ چې باید دا چاره دوام ولري.
د يادونې وړ ده، چې د لوړو زده کړو وزارت د کيفيت د تضمين او اعتبار ورکولو رياست د هېواد په لوېديځ (هرات) کې هم ورته ورکشاپ جوړ کړى و، چې لا دوام لري.