د کار او ټولنیزو چارو وزارت له لوري د لوړو زده کړو وزارت کارمندانو ته د (له ادارې سره د کارکوونکو کاري اړیکو تنظیمول) تر عنوان لاندې درې ورځنی سمینار دایر شو.
د دغه سمینار د پرانیستې په مراسمو کې د لوړو زده کړو وزارت مالي او اداري معین مولوي حافظ محمد حامد حسیب د غونډې ګډونوالو او مېلمنو ته ښه راغلاست ووایه او ویې ویل: «دا سمینار مستقیما له هغه کارونو سره تړاو لري چې تاسو یې هره ورځ ترسره کوئ، ورڅخه ډېره ګټه پورته کړئ ترڅو خپل کار په ښه ډول ترسره کړئ.»
دغه راز د کار او ټولنيزو چارو وزارت د حقوقو او تقنین چارو رئيس بشير احمد راسخ په یاده غونډه کې وویل: «د هرې ادارې لپاره چې کار کوو، نو باید د هغې لوایح، مقررات او طرزالعملونه وپیژنو، د خپلو مکلفیتونو مطابق کار وکړو.»
همدارنګه د یاد سمینار د لومړۍ ورځې په پای کې د لوړو زده کړو وزارت د بشري سرچینو رئیس مولوي سلطان محمد محسن له ګډونوالو وغوښتل چې په سمینار کې له وړاندې شویو معلوماتو څخه ګټه پورته کړي.
