د اسلامي ثقافت ملي کنفرانس ګډونوالو ته په دویمه ورځ د لوړو زده کړو سرپرست وزیر وینا وکړه
د ننګرهار پوهنتون له لوري «د اسلامي ثقافت د مضامینو د تدریس، ارزښت او اغېزې) څلور ورځنی ملي کنفرانس، چې په کندهار پوهنتون کې پیل شوی، نن په دویمه ورځ یې د لوړو زده کړو سرپرست وزیر محترم شیخ الحدیث مولوي نداء محمد ندیم د کنفرانس پر موخو، راتلونکو پایلو او د استادانو پر مسوولیتونو خبرې وکړې.
د لوړو زده کړو سرپرست وزیر وویل چې هر کنفرانس خپل ارزښت لري، خو په دې کنفرانس کې د داسې موضوعاتو اړوند څېړنې وړاندې کېږي، چې د انسان د ذات او روح په اصلاح کې ستر ارزښت لري.
هغه زیاته کړه چې له دې کنفرانس څخه موخه د اسلامي ثقافت ارزښت رابرسېره کول او د اسلامي ثقافت په اړه د استادانو تحقیق او فکر کول دي.
نوموړي دغه راز د کنفرانس په لومړۍ ورځ د امیرالمؤمنین حفظه الله تعالی خبرو ته په اشارې سره وویل: «د یوه نظام په اړه هغه پالیسي د اعتبار وړ ده، چې د هغه نظام مشر یې لري، تاسو استادانو د تحصیلي نظام، محصل او استاد په اړه د امیرالمؤمنین حفظه الله تعالی فکر او نظر ولید، چې څومره صمیمانه او د دغې برخې په پیاوړتیا څومره باور لري.»
محترم سرپرست وزیر زیاته کړه، چې د اسلامي ثقافت مضمون ځانګړی رول و، چې په کنفرانس کې یې امیرالمؤمنین حفظه الله هم ګډون وکړ، څو د پوهنتون په اړه استادان د هغه نظر واخلي او همدا راز استادانو سره د جلا والي احساس ختم او باور یې حاصل شي.
د لوړو زده کړو سرپرست وزیر همدارنګه وویل، چې په تېرو اشغالونو کې د علمي مرکزونو په نصابونو کې پردی فکر ور ګډ شوی او زیاتې ستونزې رامنځته شوي دي، د هغه په وینا؛ د دغو ستونزو حل باید د اسلامي ثقافت استادان وکړي.
پاتې دې نه وي، چې په دغه کنفرانس کې نن ورځ د استادانو او څېړونکو له لوري ۲۵ څېړنیزې مقالې وړاندې شوې.
نېټه: سه شنبه
۱۴۴۶ هـ.ق د شوال المکرم ۲۴ مه
۱۴۰۴ هـ.ش د مرغومې ۲ مه
۲۰۲۵ م د اپرېل ۲۲ مه
