د ننګرهار پوهنتون جيولوجي او کانونو اکتشاف انجنيري څانګې د درېيمې دورې ۶۷ تنه فارغانو د پروژو دفاع پيل شوه
په هغه ناسته کې چې په دې اړه جوړه شوې وه؛ د ننګرهار پوهنتون مشر پوهاند ډاکټر خليل احمد بهسودوال، د علمي چارو مرستیال پوهندوی ډاکټر محمد حامد کډوال، د ساينس پوهنځي مشر پوهندوی صفت الله شاکر او د یاد پوهنځي استادانو او محصلینو ګډون کړی و.
د ننګرهار پوهنتون مشر پوهاند ډاکټر خليل احمد بهسودوال وویل؛ چې افغانستان د کانونو له پلوه د سيمې په کچه غني هېواد دى، چې د استخراج لپاره يې مسلکي کادرونو ته اړتيا ده.
نوموړي زیاته کړه؛ د خوښۍ ځاى دى چې ننګرهار پوهنتون نن ورځ د جيولوجي او کانونو اکتشاف انجنيري مسلک کې ۶۷ تنه انجنیران فارغ او ټولنې ته د خدمت په موخه وړاندې کوي.
نوموړي فارغانو او د هغوى کورنيو ته مبارکي وویله او زیاته یې کړه، چې د وخت اړتیاوو ته په کتو به د یادې څانګې د پرمختګ او پراختیا لپاره هلې ځلې وکړي او د امکان په صورت کې به یې په خپلواک پوهنځي بدل کړي.
د ساينس پوهنځي مشر پوهندوی صفت الله شاکر د جيولوجي او کانونو اکتشاف انجنيري څانګې پر ارزښت خبرې وکړې او په ياده برخه کې يې د لسګونو محصلينو فراغت ستره لاسته راوړنه وبلله او له فارغانو یې وغوښتل چې خپل فراغت وروستى ونه ګڼي او په اړونده څانګه کې لا زياتې زده کړې وکړي، تر څو د هېواد د کانونو د استخراج په برخه کې شته تشه ډکه کړي.
