د لوړو زده کړو سرپرست وزیر د ختیځو څلورو ولایتونو د دولتي او خصوصي پوهنتونونو مسؤلینو او د ننګرهار پوهنتون محصلینو سره جلا جلا ناستې ترسره او د هغوی ستونزې یې واورېدې.
په یاده راټولېدنه کې د لوړو زده کړو سرپرست وزیر الحاج مولوي عبدالباقي حقاني د دولتي سکتور په څېر د خصوصي سکتور په ملاتړ ټینګار وکړ او زیاته یې کړه، چې د لوړو زده کړو په برخه کې یې ټول هغه خنډونه له منځه وړي، چې د دوی د پرمختګ مخه یې ډب کړې وه.
سرپرست وزیر همدا راز د یادو مسؤلینو ستونزو او وړاندیزونو د اورېدلو تر څنګ د دغو پوهنتونونو او لوړو زده کړو مؤسساتو تر منځ د علمي څېړنو کنسورشیم پرانیسته وکړه او د ده په حضور کې د ختیځو ولایتونو د دولتي او خصوصي پوهنتونونو تر منځ د څېړنو په برخه کې د ګډو همکاریو تړونونه لاسلیک شول.
په یادو مراسمو کې د ننګرهار پوهنتون رئیس پوهاند دوکتور خلیل احمد بهسودوال، د دولتي پوهنتونونو په استازیتوب د لغمان پوهنتون رئیس پوهنیار محب الله هدایت او د خصوصي پوهنتونونو په استازیتوب د یادو پوهنتونونو د اتحادیې د عامه اړیکو او مطبوعاتو رئیس محمد کریم ناصري نور هغه ګډونوال وو، چې په خپل نوبت یې خبرې وکړي.
بل لور ته ښاغلي حقاني د ننګرهار پوهنتون د مرکزي لیلیې په جامع مسجد کې د محصلینو سره ناسته وکړه او د هغوی وړاندیزونه او ستونزې یې واورېدې.
سرپرست وزیر یاد محصلین خپلو مسؤلیتونو ته ځیر کړل او زیاته یې کړه، چې محصلین باید خپل مسؤلیت او رسالت درک او په ښه توګه اداینې سره خپله غاړه د الله (ج) او ولس په وړاندې خلاصه کړي.
