د لوړو زده کړو وزارت سرپرست شیخ عبدالباقي حقاني د ترکیې له سفیر جهاد اېرګین آی سره په خپل کاري دفتر کې ولیدل
شیخ حقاني د ترکیې سفیر ته د ښه راغلاست تر څنګ، ترکیه د اسلامي امت د عزت او برم ټاټوبی وباله او ویې ویل، چې ترکیې د عثماني خلافت پر مهال د امت سرپرستي کوله او له همدې امله یې له ټولې اسلامي نړۍ سره ښې اړیکې پاللي دي. همدارنګه د افغانستان او ترکیې د ښو اړیکو لرغونتیا ته یې اشاره وکړه او ویې ویل، چې افغانستان او ترکیه دیني او کلتوري مشابهتونو لري.
د لوړو زده کړو وزارت سرپرست شیخ عبدالباقي حقاني په تحصیلي او نورو برخو کې د ترکیې له مرستو مننه وکړه او هیله یې څرګنده کړه، چې ترکیه به د تحصیلي بورسونو، په ترکیه کې د افغان زدکړیالانو د ستونزو هوارولو، د طبي او نورو علمي لابراتوارونو او همدارنګه په افغانستان کې د پوهنتونونو جوړولو په برخه کې مرسته وکړي. دغه راز د ترکیې سفارت او کارکوونکو ته یې د هر ډول همکارۍ ډاډ ورکړ.
په کابل کې د ترکیې سفیر جهاد اېرګین آی افغان ځوانانو ته د تحصیلي بورسونه او په نورو علمي برخو کې د مرستې ژمنه وکړه او ویې ویل چې ترکیې هر کال ۳سوه افغان زدکړیالانو ته د ترکیې په معتبرو پوهنتونونو کې د زده کړو لار هواروله چې دا لړۍ به تر دې وروسته هم دوام وکړي. هغه وویل چې ترکیه افغان زدکړیالانو ته په دې شرط تحصیلي بورسونه ورکوي، چې د زده کړو له پای ته رسولو وروسته به بېرته افغانستان ته راستنېږي.
د یادولو ده، چې د ترکیې سفیر د ۱۴۰۰ کال د کانکور عمومي اول نومره سلګۍ باران ته د تحصیلي بورس ورکولو ژمنه هم وکړه.
